Shillong, Naiwieng 06
U Symbud Myntri Rangbah ka Jylla ka tnad kam pohïing, Bah Prestone Tynsong ha ka Sngi Thohdieng u la kdat sharud ïa ka jingïakhih jong ka JAC ban pyrshah ïa ka projek ‘Shillong Ropeway’, da kaba ong ba ka Sorkar ka la dep kren shai ïa ka nongrim jong ka.
Haba kylli halor ka jingdawa ban pynduh noh ïa katei ka projek bad ban pynkynriah noh shawei pat, u Bah Prestone u la ong ba um don eiei shuh ban ong nalor kane.
“Ngam don eiei shuh ban ong namarba mynnin ka sngi, u Myntri ka tnad kam jngohkai pyrthei u la dep batai lut ïa kane ka mat ban buh ïa ka ‘Ropeway’ ne ‘Cable Car’,” u la ong.
U la ong ba ka Sorkar ka dang ïeng skhem halor ka jingkren jong ka ba hashuwa naba la dep ban leh ïa ki jingjurip bad jingwad bniah.
“Ngi na ka liang ka Sorkar ngi la dep ban batai. Wat ki ‘riew shemphang jong ki tnad bapher-bapher ki la dep ban leh ïa ka jingjurip (kaba bniah) bad ka jingwad bniah, kumta ngi ïeng skhem halor kaei kaba ngi la dep kren hynnin ka sngi,” la ong u Bah Prestone.
