Jowai, Naiwieng 06
U Myntri Rangbah ka Jylla Conrad K. Sangma u la ong ba ka jingthmu ban seng ïa ka Nursing College ha West Jaiñtia Hills District ka la don lypa ha ka jingpynkhreh.
Haba kren sha ki lad pathai khubor ha ka 5 tarik Naiwieng, u la ong ba katei ka jaka pule ka long kaba donkam namar ba kane ka thaiñ mynta kam don ïa ka kolej nursing, u la pynskhem biang ïa ka jingkular jong ka Sorkar bad u la ong ba u Myntri ka tnad ka Koit ka Khiah u la buddien hi dalade ïa kane.
Haba jubab ïa ka jingkylli halor ka jingthmu ban shna ïa ka kolej nursing, u Conrad u la ong, kane ka jingthmu ka la don lypa ha ka jingpynkhreh bad u Myntri ka koit ka khiah u dang buddien hi dalade ïa kane ka kam.
Halor ka jingduna ki dukan ha Iawmusiang Shopping Complex, u Conrad u la ong ba ka Sorkar ka dang bishar bniah halor kane bad pyntip ba u CEM jong ka JHADC bad kiwei-kiwei ki la aiti ïa ka jingthoh pynkynmaw, katba u MLA ka thaiñ ruh u la dep ban pynsngew ïa kane ka mat.
“Watla baroh ki kam ym lah ban leh ha ka shisien leh, hynrei ka Sorkar kan sa wad bniah lada lah ban leh biang ïa ka bynta kaba ar”, la ong u Conrad.
Haba kylli halor ka jingkyntiew kyrdan ïa ka Laskein C&RD Block, u Myntri Rangbah u la ong, ka Sorkar ka dang bishar bha ïa ka jingdawa ban kyntiew kyrdan ïa ka Laskein C&RD Block sha ka Civil Sub-division.
Haba batai ba ka jingdawa ka long kaba shongnia, u Conrad u la ong ba kan donkam ban pyrkhat ryngkat bad ki jingkyrpad kiba kum kine na ka bynta kiwei pat ki sub-division bad ki block shwa ban shim ïa ka rai.
