Shillong, Naiwieng 08
Ka Seng Samla Kur Thabah Sengkmie ka pynpaw ïa ka jingsngewsih kaba khraw halor ka ka jingkhlad noh ka samla Rachellien Thabah namar ka jingjia ba la kynnoh ba ka la mynsaw ingding ha ka step jong ka sngi u Blei ha ka taïew ba la dep.
“Ngi kum ki samla jong ka Seng Samla Kur Thabah Sengkmie, ngi pynpaw ïa ka jingsngewsih kaba khraw halor ka jingduh noh ïa ka Samla Rachellien Thabah, kawei na ki samla jong ka Kur Thabah, ha kane ka jingjia kaba sngewsih bad kaba pynkhuslai ïa kiba bun” ong ka kyrwoh khubor u Bah Donboklang Thabah, Publicity Secretary Seng Samla Kur Thabah Sengkmie.
Katkum ka jingujor jong ka kmie, ka Samla Rachelline Thabah ka la mih na la ïing ha ka 29 tarik Risaw 2026 ban leit sha Guwahati ban ïa shim bynta ha kawei ka prokram bad ka la pyntip ba kan wanphai ha ka 01 tarik Naiwieng 2026. Hynrei, ha ka step jong ka 01 tarik Naiwieng, ha ka por kumba 3:30 baje mynstep, ka kmie ka la ïoh jingtip ba ka la mynsaw jur na ka jingshah thang ha kawei ka ïing ha thaiñ Mawlong, ha kaba ka la leit sah bad uwei u briew. Hadien kane, la pynkit ïa ka sha NEIGRIHMS Hospital ban ïoh jingsumar.
Ka long kaba sngewsih shisha ban tip ba ka jingim jong ka samla ka kur ka kut noh ha kum kane ka rukom, kaba la wanrah ïa ka jingsngewsih kaba khraw ym tang ïa ka ïing ka sem hynrei ïa ka Kur Thabah hi baroh kawei.
“Ngi pynrem jur ïa kano-kano ka jingleh donbor, ka jingshah pynmynsaw bad ki kam kiba long pyrshah ïa ka hok bad ka jingim jong ki briew. Ym don mano-mano ruh ba dei ban duh noh ïa la ka jingim na ka daw jong ka jingleh jong kiwei” u la ong.
Kum ka Seng Samla Kur Thabah, “Ngi kyrpad jur ïa ki bor ka aiñ bad ki tnat pulit ba kin pynlong ïa ka jingtohkit kaba bniah, kaba laitluid bad kaba khlem shah liang, khnang ba yn lah ban lap ïa ka jingshisha baroh halor kane ka jingjia. Ngi kwah ba kino-kino kiba donkti, lada lap kin shah pynngat ha ki kyndon aiñ katkum ka jinglong jong ka kam. Ngi kyrpad ruh ba ka jingbishar kan long kaba hok bad kaba shai, khnang ba ka hok jong ka samla Rachel bad jong ka ïing ka sem kan ym shah ñiew beiñ.”
Ha kajuh ka por, “Ngi kum ka Seng Samla ngi kwah ban ai ïa ka jingkyntu kaba kyrpang sha baroh ki samla jong ka Kur Thabah, khamtam eh ïa kito kiba leit jingleit shabar, kiba trei bad kiba sah shabar jong ka Jylla, ba kin long kiba husiar ha ka jingïadei bad ki briew kiba nabar Jylla. Ngi kyntu ïa ki samla ba kin tip bniah ïa ki briew kiba ki ïadei, kiba ki shaniah bad kiba ki sahlang, namar ka jingshngaiñ jong ka jingim ka long kaba kongsan tam.”
Ka Seng Samla Kur Thabah ka pynshai ba kane ka jingkyntu kam mut ban pynjah burom ïa kano-kano ka jaidbynriew ne ban kynnoh ïa baroh ki briew kiba nabar Jylla, hynrei ka long tang ka jingpynkynmaw ïa ki samla ba kin long kiba phikir, kiba stad ban bishar bad kiba ym dei ban shaniah kyrkih ha ki briew khlem da tip bniah.
Ha kane ka por kaba dap da ka jingsngewsih, ngi phah ïa ka jingsngewlem sha ki kmie ki kpa, ki bahaïing hasem bad baroh kiba la mad ïa kane ka jingduhnong kaba khraw. Ngi duwai ba u Blei un ai ka bor, ka jingshlur bad ka jingsuk mynsiem ha kane ka por kaba eh.
“Ka jingim jong ka samla Rachel ka long kaba kordor. Ngi kyrmen ba ka jingshisha kan mih shai bad ba ka jingbishar hok kan urlong” la bynrap ka kyrwoh ka Seng Samla.
