Shillong, Naiwieng 08
Ki MLA kiba la ieh noh Bah Vincent H Pala ban beh ïa ka doh ki la kut khlem ïoh eiei, la ong u MP barim ka Rajya Sabha Dr Wanweiroy Kharlukhi sha ki paidbah ha ka jingïalang kaba la long ha ka sngi Thohdieng jong ka taïew ba la lah ha Dawki, bad ha kaba u la ai jingïaroh ïa u Bah Pala ba marwei u la lah ban dang pynneh ïa ka Congress ha Meghalaya.
Ha ka jingïalang ïalap ilekshon ha Dawki, West Jaiñtia Hills District na ka bynta u Bah Pala ban sa ïakhun ïa ka ilekshon MP shiteng samoi ka ban sa long shen u Dr Kharlukhi u la ong ba kito kiba la phet ki la ap palat ïa ka shi snem ne ar snem ban ïoh shuki Myntri hynrei kim pat ïoh eiei haduh mynta, katba u Bah Paul Lyngdoh, uba la ieh noh ïa ka UDP shi taïew shwa, u la ïoh beit beit ïa ka shuki Myntri.
“Nga sngew synei na ka bynta kito ki MLA kiba la ieh noh ïa ka Congress. Lada ym dei na u Bah Pala, katta ka Congress ka la dep ban khylliap lama hapoh Meghalaya,” u la ong. “Ki la mih da ka jingkyrmen skhem ba kin ïoh ka doh met. Ki la mih na ka Congress la palat ïa ka shisnem bad ar snem tam, kim shym la ïoh bhah ha ka Kynhun Myntri, hynrei u Bah Paul Lyngdoh uba la mih na ka UDP tang ha ka shi taïew u la shah thung kum u Myntri ka Sorkar,” u la ong.
“Kam dei satia tang ban don ïa u thylliej uba jrong hynrei ban khmih bniah ba ki bniat jong phi kin nym kdiah, namar ynda la wan ka ilekshon bad ki bniat jong phi ki kdiah, kata ka la kut,” maham u Dr Kharlukhi.
“Ha ri lum Garo, ym don ba peit ïa ka shuki MP na Tura Parliamentary Konstitwensi kaba la bat haduh 25 snem da u (L) PA Sangma bad ka ïing jong u. Bad ha ka por ba u Bah Vincent H Pala u dang long President ka MPCC, ïa kata ka shuki la knieh noh na ka kti jong ka NPP. U Bah Vincent Pala, President ka MPCC, u la knieh noh,” ong u Dr Kharlukhi. “Ym don ba ïohi ïa kata, namar ki ïohi tang ïa kata ka lyngkhot doh kaba don ha ka Sorkar,” u la ong.
Ha kawei pat ka liang, u Dr Kharlukhi u la ïathuh lypa ba ka Congress kan sa wan phai biang sha ka bor ha u snem 2028. Ha ka ilekshon Lok Sabha ha u 2024, u la ong ba ka Congress ka la lamkhmat ha ki 22 tylli ki Assembly konstitwensi kiba hap hapoh ka Tura seat, katba ka NPP ka la lamkhmat tang ha ki ar tylli.
“Ngam don jingartatien ba ka Congress kan wan ha ka bor ha u snem 2028,” u la ong bad bynrap “Thoh ïa ka paidbah, mynta ka sngi, khnang ba phin kynmaw ynda ka la jia ha u snem 2028, ym don mano mano ruh ban lah ban thaw Sorkar ha Meghalaya khlem ka Congress.”
U la pynkut da kaba kob beit beit ïa u Myntri Rangbah ka Jylla Conrad K Sangma, uba la kren ha ki kotkhubor ba ka NPP kan jop da kaba suk. “Sir, lada phi sngew skhem, pynlong lang ïa ka ilekshon MDC bad MP hajuh bad ngin sa ïohi ïa ka jingmih,” u la ong.
