Shillong, Naiwieng 10
Ka ïingbishar Special Judge (POCSO) ka Ri-Bhoi District kala hukum ban set along 20 snem ïa ki lai ngut ki runar ha ki artylli ki case kiba hap hapoh ka Protection of Children from Sexual Offences (POCSO) Act.
U Superintendent of Police ka Ri-Bhoi u la ïathuh ba uwei na kine ki runar u dei u Kitbok Mynsong (24 snem) uba la shah tian bishar katkum ka Women Police Station Case No. 39(05)2020.
U Kitbok u dei u khun ka Nibaion Boro jong ka Kjatlumshani kaba hap hapoh ka thanad Nongpoh bad ïa kane ka case la tohkit da ka WPSI S Ryngksai.
Ka ïingbishar Special Judge (POCSO) R.M Kharsyntiew kala hukum ban set phatok 20 snem ïa une u runar lem bad ka kuna ba T.10,000 hapoh ka kyndon 3(a)/4(2) jong ka POCSO Act, nalor ka jingset phatok ba 20 snem bad ka kuna ba T.20,000 hapoh ka kyndon 5(j)(ii)(n)/6 jong ka Act.
Ki arngut kiwei pat ki dei u Skhemborlang Khardewsaw (25 snem) bad u Polishal Khardewsaw (23 snem) khun ka Kong Spilinda Khardewsaw, kiba la shah tian bishar katkum ka Women Police Station Case No. 03(01)2026. Kine ki arngut ki dei ki shipara na Sohkyndur kaba hap hapoh ka thanad Umiam.
Ïa kane ka case la tohkit da ka WPSI W. Khongsit bad ka ïingbishar kala hukum ban set phatok 20 snem ïa ki nalor ka kuna ba mar T.10,000 hapoh ka kyndon 5(m)(n)/6 jong ka POCSO Act, 2012.
