Nongpoh, Naiwieng 10
Ki nongïalam ka Khasi Students’ Union (KSU) Sengkmie ryngkat lang bad ki dkhot na ka North Khasi Hill District Unit ha ka sngi Ba-ar kila pynlong biang ïa ka jingjurip ïa ka Facili-tation Centre ha Umling, Ri Bhoi District kaba la khot da ki bor pynïaid District ka Ri Bhoi.
Ha kane ka sngi la wan ban ïadon ryngkat u Bah Eric Kevin Dkhar, Block Development Offi -cer ka Umling C&RD Block, Bah B. Nong-kynrih Tourist Officer ka Ri Bhoi, Bah E. Khar-mon District Transport Officer, ki heh pulit ka Ri Bhoi ryngkat bad ki trai ka Briwar Resorts ba pyntrei ïa katei ka jaka.
Haba kren sha ki lad pathai khubor, u samla Raymond Kharjana, President ka KSU ha ka jingdon ryngkat u samla Reuben Najiar General Secretary, samla Pynkmenlang Sanmiet Vice President, samla Ferdynald Kharkamni, President ka NKHD lem bad kiwei, u la pynpaw ïa ka jingsngewbynñiaw ba kaei kaba la dep ban ïakren bad ka Sorkar ka long pynban mar khongpong kumba la sakhi ha kane ka sngi.
U la ong ruh ba ka jingthmu ba kongsan jong kane ka jaka ka dei ban pyntreikam ïa ka Meghalaya Residents Safety & Security Act na ka bynta ban buh ïa ki facilitation centre ban khmih ïa ka jingrung jingmih jong ki bar jylla, hynrei ka jaka kaba la mang ka long kaba rit eh katba ïa ki bynta ki bym don bynta bad ka facilitation centre la ai da kiba heh lai shah saw shah.
U samla Raymond Kharjana u la pynpaw ïa ka jingbym hun ha kane ka jingjurip kaba u la ong ha ka jingshisha na ka liang ka seng ka dang mut ba kane ka jingjurip mynta ka sngi kan dei ka sien ba khatduh naba na ka liang u Myntri Rangbah ka Jylla, u Conrad K. Sangma u la kular sha ka seng ba ka facilitation centre kan long kum ka jingai sngewbha Khristmas.
Haba na ka liang ka seng ki pyrshang kylli na ki ophisar ba kane ka jaka kaba rit kaba mang na ka bynta ka facilitation centre kan don ïa kino-kino ki tnad treikam Sorkar, ki ophisar kim lah satia ban ai ka jubab kaba hun kumba la kwah da ka seng ban don ïa shibun ki tnad treikam ba kynthup naduh ka Tourism, ka Labour, ka Infiltration, ka Education kaba la pynlong ïa ka kane ka jingjurip ban shu kut ha ka jingbym hun.
Kumba la sakhi ha kane ka sngi, ka jaka kaba la thmu ban tei ïa katei ka facilitation centre ha Umling ka dei kaba tang shi troh haba nujor bad ka food court kaba ka Sorkar ka angnud ban tei ha katei ka jaka.
Utei u nongïalam ka KSU u la ong ruh ba lada ka Sorkar ka dang ïai pynlong kamkai ïa kane ka kam, na ka liang ka seng kam banse ban hap shim da kiwei pat ki sienjam ban leh ïa kaba donkam.
