Shillong, Naiwieng 10
U President ka HSPDP Bah K.P Pangniang u la ong ba ka seng ka la pynkynmaw ïa ka Sorkar Jylla ba kam dei shuh ban aidaw haba ïadei bad ka jingpynbeit pud bad ka Jylla Assam.
Kane ka jingpynpaw u Bah K.P Pangniang haba ïakren bad ki nongthoh khubor hadien ba la wai ka General Council kaba la long mynta ka sngi ha Shillong.
U Bah Pangniang u la ong ba ka Sorkar ha kine ki snem ba la leit ka la ai daw ban pynbeit noh ïa ki 6 tylli ki sector namar ka jingdon ka ilekshon MLA ha Assam, ka jingwan ka ilekshon MP Lok Sabha bad mynta sa ka jinghiar shuki Myntri noh u Bah Metbah Lyngdoh uba dei u Chairman ka Regional Committee West Khasi Hills District.
“Nangne shakhmat ka Sorkar kam dei shuh ban aidaw namar ngim kwah ba ka jingpynbeit pud kan suki, namar kumba ngi kyrshan ïa ka Sorkar, ngi kwah ba ka Sorkar kan pyndep noh ïa ka jingpynbeit pud” u la ong.
U la ïathuh namar ka HSPDP ka ïatreilang bad ka Sorkar, ka kwah ban pynkynmaw ïa u Myntri Rangbah ka Jylla u Conrad ban pyndep noh ïa ki hynriew tylli ki Sector kiba sah.
Shuh shuh u la ïathuh ba ha kane ka jingïalang jong ka HSPDP la ïoh ban pynthymmai ïa ki nongkitkam, la ïoh ban pynkhreh ïa ka jingdap 60 snem ka ban long ha u snem 2028.
U la pynkynmaw ba ka HSPDP kaba la ïatreilang bad ka Sorkar Jylla ka la pynpaw ka jingsngewkmen namar ka Sorkar ka la ithuh ïa ka ktien Khasi bad Garo kum ka ktien Sorkar, nangta ka jingmynjur ïa ka ILP ha ïingdorbar ha ka Sorkar MDA-1.
U la pyntip ba ka seng ka dang buddien ïa kiwei de ki mat kiba dang sah na bynta ka jingmyntoi jong ki paidbah ka Jylla.
