Shillong, Naiwieng 10
Ka Kong Angela Rngad, kawei na ki nongshong shnong na Laban, kaba la wan ban kyrshan ïa ka Joint Action Committee (JAC), kiba pyrshah ïa ka projek Ropeway, ka la pynpaw ka jingsngewnguh ïa ki longkmie, kiba la mih shakhmat ban ïakhun na ka bynta ka hok jong ki paidbah, khamtam ban ïada ïa u Lum Shyllong, uba don ka tyllong umbam umdih kaba biang bad ban ïada ïa ka jingim jong ki pateng ban wan.
Haba kren halor kane ka jingïakhih, ka Kong Angela ka la ai jingïaroh ïa ki longkmie ka JAC, kiba la pynlut por haduh san sngi lynter ban shongïakhih kyllaiñ mungor, da kaba ong “Kam long kaba suk ïa ki ban ieh ïa ki kam ki jam bad ïa la ki khun ki kti, ban wan ïashim bynta ha kane ka jingïakhih”.
Ka la pynpaw ruh ïa ka jingsngewsih bad pynrem jur ïa ki nongmihkhmat bad ki ophisar Sorkar ba katkum ka jingong jong ka, kim shym la pynleit jingmut ha ka jingdawa jong ki paidbah, hynrei ki la leit shang shabar ri, kynthup ha London.
Ka Kong Angela ka la kynnoh ruh ba ïa ka jinglut jingsep jong kine ki jingleit shang, la pyndonkam da ka pisa paidbah, hynrei kim pat wanrah ïa kano-kano ka jingmyntoi na ka bynta ka bha ka miat jong ki paidbah.
“U Myntri ba dang thymmai ruh ba khmih ïa ka tnad kam jngohkai pyrthei, u leit poi kylla sha London ha ka jaka ban peit ïa ka jingeh bad jingdawa ki longkmie ka Laban,” ka la ong.
“Ha Shillong ka jingkyrduh kam dei tang ïa ki briew kiba kha ha Laban hynrei ngi tip ba ka um ka wah ba tuid na Lum Shyllong, ka dei kaba ai sha kylleng ka Sor Shillong. Ngi dei ban ïamih lang ban pyrshah ïa kane ka projek, khnang ban wanrah ka jingmyntoi ha ka pateng ban wan,” la ong ka Kong Angela.
Ka la ong ruh ba donkam ka Ropeway na ka bynta ki nongrep, ba kin kit ïa ki mar-rep jong ki, ym sha ki jaka bym donkam bad ka ban ktah ïa ka mariang bad ka umbam umdih.
Ka la dawa ba ki bor ba dei khmih, ki dei ban shimkhia ïa ka jingdawa jong ki longkmie ka JAC bad ki paidbah.
