Jowai, Naiwieng 10
U MP barim jong ka Rajya Sabha u Dr. W.R Kharlukhi u la ong ba ka Sorkar BJP ka thmu ban kynrup ïa ka jingdon jingem jong ki Balang Khristan da kaba pynkylla ïa ki kyndon jong ka aiñ Foreign Contribution Regulation Act (FCRA) bad dei na kane ka daw u mih noh na ka NPP kaba ïatreilang bad ka BJP ha Delhi.
Ka Sorkar BJP ka la wanrah ïa ka jingkylla jong ka Kyndon 16 (a) jong ka FCRA kaba ai bor ïa ka Sorkar ban kynrup ïa ki ïingmane, ki skul ki kolej ki hospital bad kiwei-kiwei de ki jingdon jingem jong ki Balang Khristan kiba ïoh jingïarap na shabar ri katkum ki kyndon jong ka aiñ FCRA, ong u Dr. Kharlukhi haba ïalap ileshon na bynta u kyrtong ka Congress u Ma Vincent. H. Pala ha ka Madan Dai Masi, Ladthadlaboh, Jowai ha ka janmiet 10 tarik Naiwieng.
U MP barim jong ka Rajya Sabha u la ong ba ula rai ban ïasoh noh bad ka Congress namar ba ka la ïeng pyrshah ïa katei ka jingthmu ban pynkylla ïaki kyndon jong ka FCRA da ka Sorkar BJP bad dei na ka daw jong ka jingpyrshah jong ka Congress, ka BJP kam pat shym la lah ban wanrah ïa katei ka bill ban pynkylla ïa ka FCRA.
U Dr. Kharlukhi u la ïathuh ba ki saw ngut ki MLA jong ka Congress ki la mih noh na ka party bad ki la leit ïasoh bad ka NPP namar ba ki kwah doh pasoh bad ula ong ba ka Congress hapoh ka jingïalam jong u Ma V.H Pala ka la jop ïa ka Tura Constituency ha ka ileshon MP da kaba pynkhyllem noh ïa ka jingsynshar na ka ïing jong u Purno A. Sangma.
Ha kawei pat ka liang, u MDC jong ka Khliehtyrshi Constituency u Ma Madonbai Rymbai u la pynkynmaw ba dei ha ka por ba long MP u Ma Vincent H. Pala ba la shna ïa ka East Jaiñtia Hills District ha u snem 2012 da kaba phiah ïa ka Jaiñtia Hills District ha ki artylli ki District, la wanrah ïa ka ophis passport ha Nangbah Shillong, la sdang ïa ka kam ban pynheh ïa ka Umroi Airport bad seng ïa ka Hospital NEIGRIHMS.
U la ong shuh shuh ba la seng ïa ka Hospital MCH ha ka Panaliar Jowai ha u snem 2012-13 hynrei katei ka hospital MCH mynta kam biang ki doktor, ki nos bad kor X-Ray.
Ha kajuh ka por u President jong ka West Jaiñtia Hills District Congress Committee (WJHDCC) & MDC jong ka Sahsniang Saphai u Ma Rikut Parien u la ong ba ka nongrim jong ka Voice of People Party ne party Prah ka biang nadong shadong tangba ynda ka jop ka ïeng ha ka pdeng kam leit sha liang pyrshah ne liang kyrshan.
U la kyntu ïa ki paidbah ba kim dei ban jied ïa u kyrtong jong ka NPP namar ba ka NPP ka dei ka paralok jong ka BJP bad ka BJP ka la wanrah ïa ka aiñ CAB ne ka Citizenship Amendment Bill kaba ktah ïa ka bha ka miat jong ka Jylla Meghalaya.
U President barim jong ka Jaiñtia Students’ Union (JSU) u la pynkynmaw ba ka dei ka Congress kaba la ïakhun, ban wanrah ïa ka jinglaitluid jong ka Ri India na ka jingsynshar ki phareng.
U la ong shuh shuh ba ha ka jingsynshar jong ka Congress baroh ki jait niam ki ïoh ban mane laitluid khlem kino ki jingshah pynthut hynrei mynta naduh ba synshar ka BJP ka la don jingteh jingkhum ïa ki niam rit paid.
