Shillong, Naiwieng 10
U Superintendent of Police (SP), East Khasi Hills District, u Bah Vivek Syiem u la ong ba mar shu ïoh jingtip ba la don ka jingkem ding ha kawei ka kudam ha Demseiñïong, ki bor pulit pynlip ding ki la leit mar-mar sha katei ka jaka.
Kane ka jingjia ka dei ha ki por kumba 2:30 eiei janmiet ka sngi Ba-ar.
“Kumba ka long mynta, ki kali pynlip ding kiba la wan ban tem ïa ka ding ki la don 6 tylli na Meghalaya State Police Fire Service, kumjuh ki BSF, Assam Rifles, Air Force ruh ki la wan ban ïarap lang,” u la ïathuh.
“Don shibun ki tiar ba kem ding kiba la julor. Na ka ling ki pulit kim pat ïoh jingtip halor ka daw ba la kem ding, hynrei ngi la kren bad ki trai, lah ban long na ka jingthud ka bording ilectrik, (short circuit) ne da kawei ka daw ka jingtohkit kan dang ïaid,” la ong u SP.
U la pyntip ba ha kane ka jingjia, kam shym la don kano-kano ka jingjia ba sngewsih.
“Haba poi ha kane ka jaka ka kam ba nyngkong eh ba ngi la leh ka long, ban pynkynriah ïa ki lynti ban ïaid ki kali pynlip ding, ban pynkynriah ïa ki briew na ki ïing kiba marjan, bad ban sei lut ïa ki cylinder gas, khnang ba ka ding kan ym saphriang sha kiwei pat ki jaka,” la bynrap u SP.
