Nongstoiñ, Naiwieng 10
Ka Federation of Khasi Jaiñtia and Garo People (FKJGP) West Khasi Hills District Unit ha ka sngi Ba-ar ka la leit ban ïakynduh ïa ka Deputy Commissioner jong ka West Khasi Hills District, ka Hema Nayak na ka bynta ban pan jingshai halor ka MRSSA bad kumjuh ïa ka Entry Exit Point.
U Vice President ka FKJGP West Khasi Hills Bah Cary Oscar Kharmuti haba kren sha ki lad pathai khubor u la ong, na ka liang ka seng kala ïohi ba baroh shi katta ka Athiabari ka dei kawei ka jaka ba ka Sorkar kala thmu ban buh ïa ka Entry Exit Point hynrei haduh mynta ym pat ïohi dak eiei ba kan don ka jingtreikam bad ka dang long thylli bad ka dang don tang ka Infiltration Check Gate.
U la ong ruh ba ha ka jingïakren bad ka DC, na ka liang jong ka, kala kular ba kan sa ai ka jubab sha ka seng lyngba ki jingthoh.
Ha kaba ïadei pat bad ka MRSSA, u Bah Cary u la ïathuh ba na ka liang jong ka DC kala kubur ba kala don hi ba na ka liang jong ka Sorkar kila buh ban ïakren hynrei kim pat ïoh pat ki jingpynshai halor kumno ban pyntreikam ïa ka MRSSA.
Une u nongïalam ka FKJGP u la ong, “Na ka liang ka seng ka dawa na ka Sorkar ba ka dei ban shimkhia noh ïa kitei ki ar tylli ki mat ban pyntreikam namar kumba ka long ka WKHD ka dei kaba bun bha ki jaka rung bad jaka mih bad kaba ki lah ban talasi ka dei tang ha Athiabari hynrei ki don ki jaka kum ha Langpih bad Ïew Nongma kiba dei ki jaka khappud bad ka Assam, bun kiba shu ïarung ïamih khlem don jaka pyrkhing.”
Shuh shuh u la ong ruh ba na ka liang ka seng kan nym shong thait hynrei kan ïai bteng ban buddien ïa ki mat jingdawa tad haduh ba ka Sorkar kan shimkhia ban pynurlong bad ban pyntreikam noh shi syndon.
