Shillong, Naiwieng 10
U President ka Congress ha Meghalaya Bah Vincent H. Pala ha ka Sngi Ba-ar u la ong ba ka jingsar jong ka Voice of the People Party (VPP) ha u snem 2024 kan ym jia shuh, da kaba kynnoh ba ka VPP ka la shet kylla naba kam shym la bat la ki kular bad pynsniew ruh ïa ki jingmyntoi ba ïadei bad ka jingïoh bhah jong ki paid Khasi bad Jaiñtia.
“Ka VPP ka la hiar. Haduh katno ka la hiar, ngin sa tip tang ynda la poi ka ilekshon bad baroh ki pynbna ïa ki kyrtong jong ki,” la ong u Bah Pala hadien ka jingïalap ilekshon na ka bynta ka ilekshon shiteng samoi sha ka Shillong Lok Sabha kaba la long ha Sutnga.
“Hynrei nga la ïohi kat shaba nga leit, wat ha Nongkrem, ha Mylliem, kiba bun ki paidbah ki la sakma. Bun na ki, ki la duh jingkyrmen shi kat dei, bun na ki, ki la kylla long ki nongtrei jong ngi ruh. Ka VPP kan ym ïoh shuh ïa ki ‘vote’ kiba ki la ïoh mynshuwa,” u la ong.
U Bah Pala u la ong ba ka VPP ka la wan ha ka bor halor ka nongrim jong ka jingkitkhlieh bad ka jinglong khuid ha ka jingtreikam, hynrei kam shym la lah ban leh kumba la kular.
“La ka dei ka VPP ne ka BJP, kin hap ban bat la ka kular jong ki. Ka VPP ka la kular ha ki paidbah ba kan don ka jingkitkhlieh bad ka jingtreikam kaba khuid ba suba, bad phi ïohi mynta ba ki la nang bun ki khyrdop kiba mih. Kam don satia kata ka jingkitkhlieh, kam don ka jingkhuid-jingsuba,” u la ong.
U la kdew ruh ïa ka jingkular jong ka seng halor ki ‘Trading License’ kum ka nuksa jong kaei kaba u ñiew kum ka jingkular ba la pynkheiñ.
“Ki la ong ba kin ym ai ‘Trading License’, hynrei nga la ïohi da la ki jong ki khmat, ki briew kiba trei ha NEIGRIHMS, baroh ki ïoh ïa ka ‘Trading License’,” la ong u Bah Pala.
“Kumta kam don jingïapher, mynshuwa, ha ka por ba ka VPP kam pat don bad mynta haba ka VPP ka don,” u la ong.
Une u nongïalam ka Congress u la ong ba ka jingshet kylla kaba khraw eh ka la long halor ki kam ki jam bad ka jingïoh bhah kyrpang.
“Ki bym dei ‘riewlum, kumba ju long, ha ki ar snem, katba ka jingkular ka pher. Ka jingkyrmen jong ki paidbah ba kin ai kam ai jam, hynrei ka ‘Reservation Policy’ ka la sniew, khamtam na ka bynta ka Ri-lum Khasi bad Jaiñtia,” u la ong.
“Kumta baroh ki la shah pynsniew, namar ki la kut jingmut, ki la kular, hynrei kim leh,” u la ong.
Shuh shuh u Bah Pala u la ong ba ki nongthep ‘vote’ khamtam kiba dang samla kin ym shah pynbiej.
“Ki briew jong ka Meghalaya ki long kiba stad, khamtam ki briew jong ka Ri-lum Khasi bad Jaiñtia. 37% na ki nongthep ‘vote’ ki dei ki samla, bad ki samla ha kine ki sngi ki don lut ki jingtip ha ki kti jong ki, la phi long kiba don ka jingkitkhlieh ne phi long kiba ïaineh bad ki kular jong phi”, u la ong.
Haba kam ba ka jinglong-jingman ka saiñ pyrthei ka la kylla ha ka liang jong ka Congress, u Bah Pala u la bynrap, “Ka Congress ka la nang khlaiñ kat nang mih ki sngi.”
