Shillong, Naiwieng 10
U President ka Meghalaya Pradesh Congress Committee (MPCC) Bah Vincent H. Pala ha ka sngi Ba-ar u la ong, ki MLA kiba leit ïasoh sha ka Bharatiya Janata Party (BJP) kila pynïap hi dalade ha ka saiñpyrthei bad kila nangjur ka jingkhuslai mynta ban ïa kaba long hashwa ba kin kynthih sha kane ka party.
U Bah Pala u la ong ba ki jingphet seng hashuwa ka ilekshon ki dei kiba ju jia beit, hynrei ka BJP kala pyndonkam ïa ka spah jingdon jingem ban khroh ïa ki nongïalam da ki jingkular kiba kam bat satia.
“Nga tharai ka ju jia beit hashwa ki ilekshon, ka jingïarung ïamih bad phet seng. Ka BJP, ki don bun bah ki jingdon jingem ban pynbiej ïa ki briew,” ong u Bah Pala bad bynrap “Kum ka nuksa, phi la ïohi ïa ki briew kiba leit ïasoh bad ki, mynta kila nang khuslai ban ïa kaba long hashwa”.
Halor ka jingkam u President ka BJP Rikman G. Momin ba kin dang bun ki MLA kiba la khreh ban sa pynïasoh sha ka BJP, u Bah Pala u la ong, ka BJP kan kam lut ïa kiei-kiei baroh, hynrei ki jingtreikam jong ka ha ki snem ba la leit ha Meghalaya kila pyni da kumwei.
“Lada phi peit ïa ka histori jong ka BJP, kat kiba ïasoh sha ka BJP ha Meghalaya, lait noh u Bah A.L Hek bad Bah Sanbor Shullai, kiwei-kiwei nga tharai kin pynïap dalade ïalade ha ka saiñpyrthei,” ong u Bah Pala.
U la batai antad ba kajuh kan long ïa ki phra ngut ki MLA barim ka United Democratic Party (UDP) kiba la kynthih dang shen sha ka sem jong ka BJP.
“Wat kine ki phra ngut ki MLA kiba la kynthih sha ka BJP, nga tharai ba kin sa leit phai biang sha la ka jong ka party lane sha kiwei ki party lada ka BJP kam bat ïa la ki jingkular,” u la ong.
Shuh shuh u Bah Pala u la kynnoh ïa ka BJP ha Meghalaya ba kam don satia ïa ka polisi treikam ka ban neh kumjuh bad ka dei ruh ka bym ju bat ïa la ki kyntien. U la kynnoh ruh ba ka BJP kam ju pyrkhat na ka bynta ki ritpaid bad ki Khristan.
