Shillong, Naiwieng 11
Ka Khasi Jaiñtia Deficit School Teachers Association (KJDSTA) ha ka sngi sdang ka jingïakhih ban sangeh treikam khlem buh por, ka la pynpaw ba ka la ïohpdiang ïa ka shithi na ka tnad pule puthi ka Jylla, hynrei ka kynhun ka la kyntait ban pdiang ïa kane da kaba kynnoh ba ka dei kajuh ka shithi ba ka Sorkar ka la phah mynha ka 9 tarik Risaw 2026.
Haba kren ha ka sngi Balang u President ka KJDSTA Babu Boswell Pala u la ong ba ki nonghikai ki la pule ïa ka shithi ba ïoh pdiang lyngba ka WhatsApp da ka jingkyrmen, hynrei ki dap da ka jingbynñiaw ban tip ïa kaei kaba la thoh ha ka shithi.
“Mynta ka dei ka sngi ba nyngkong jong ka jingsangeh treikam ba khlem buh por. Ban kren beit ïa ka mat, hynnin ka miet ngi la ïoh ïa ka shithi na ka tnad pule puthi lyngba ka WhatsApp bad ngi pule ïa ka da ka jingkyrmen bad jingkmen, hynrei ka la pynsngewsih shisha ïa ngi haba ngi shem ba ka dei kajuh ka shithi ba ka tnad pule puthi ka la phah ha ka 8 tarik Risaw, 2026” la ong u Babu Boswell bad u la bynrap ba ka shithi kam dei eh thik, hynrei ki don katto katne ki jingpynbha jingpynkylla bad ba la pynbeit ïa ki kawei hadien kawei katkum ka jingdawa.
Halor ka Dearness Allowance, u Babu Boswell u la ong ba ka Sorkar ka dang ai ïa kajuh ka daw ba ka kam ka dang ïaid. “Ha ka shithi ba 8 tarik Risaw, 2026, ki la ong ba ïa ka DA bad DA arrear yn sa pynlait ha shuwa ka shuti Puja bad ha kajuh ka por ka jingpynkhreh ïa ka kam ka dang ïaid” u la ong.
Shuh-shuh u Babu Boswell u la ong ka Sorkar ha kane ka kynti ba mynta ruh ka Sorkar ka la pyndonkam da ki juh ki kyntien, “Ïa ka DA bad DA arrear yn sa pynlait, mynta ka jingpynkhreh ka dang ïaid, Ngi shu kwah ban kylli, haduh lano ba yn lah pyndep ïa kita ki kam ka jingpynkhreh ban pynlait? Haduh katno kata ka jingbishar ïa ka jinglut jingsep kan shim por? U la buh jingkylli.
Halor ka Centralised Provident Fund (CPF) Scheme, u Babu Boswell u la kynnoh ba ka tnad ka la pyrshang ban pynduh noh ïa ka Scheme 2023 ba la mynjur lang da ka Sorkar bad ki nonghikai, hadien ba ka Sorkar dalade ka la pyntip ha Ïingkashari ba ka skhim ka dei kaba donkam hapoh ka 1969 Act.
“Ki la pyrshang ban wad daw ïa ka, ym ïa ka Act, hynrei ha ka rukom ba ki pynshai ïa ka aiñ” u la ong. “Ha kawei ka rukom, ki phla ïa ki jingbakla jong ki, lane ki pynpaw hi ïa ki jingbakla kiba ki la leh. Haba nga ong ïa kane, kin ong ba nga pynmong ïa ki, hynrei ka dei ka jingshisha bad ki jingshisha ka ju pynmong” u la ong.
“Ïa ka skhim jong u snem 2023 la thaw namar ba ka Sorkar ka la pynshai ha ïingbishar ba hap ban don ïa ka skhim katkum ka Aiñ jong u snem 1969” u la ong. “Ka aiñ jong u snem 1969 ka bthah ba hap ban don ïa ka CPF, bad na ka bynta katei ka pisa hap ban don ruh ïa ka skhim. Ïa ka skhim jong u snem 2023 la mynjur lang da ka Sorkar bad ki nonghikai”
U Babu Boswell u la kyntait ïa ka jingbatai jong ka Sorkar ba ka aiñ jong u snem 1969 kam kdew ba haduh katno sien ba dei ban thaw thymmai ïa ka Board of Trustees. “Ki ong ba ka aiñ jong u snem 1969 kam batai katno sien dei ban thaw thymmai ïa ka Board of Trustees, lane katno por hap ban pynkylla ïa ka” u la ong.
Haba kren halor ka jingthungkam, u Babu Boswell u la ong ba ka jingkam jong ka Sorkar ba ki kam ki ïaid beit ïaid ryntih kam shym ïahap satia bad kaei kaba jia ha madan. “Ki pyni kumba baroh ki kam ki ïaid beit ïaid ryntih, hynrei ngi ïoh jingtip na kiba bun ki skul ba kim shah ban pynmih jingpynbna ban thungkam bad kim ïoh ïa ka jingmynjur ïa ki kyrteng jong ki kyrtong kiba ki la jied lyngba ka rukom kaba dei, kiba ki la phah sha ki ophis SDSEO bad DSEO” u la ong.
Haba jubab ïa ka jingkyrpad jong ka Sorkar halor ka “Lynti ban ïaid shakhmat”, ba ki nonghikai ki dei ban don ryngkat bad ki khynnah skul katba ka snem pule ka la jan poi sha kaba kut, u Babu Boswell u la ong ba ka jingkynnoh ka leit sha ka Sorkar.
