Nongstoiñ, Naiwieng 11
Ka All Meghalaya Labour Association (AMLA) Mawshynrut Circle ha ka jingdonlang ki nongkitkam jong ka CEC ba kynthup ïa u President Bah Newsonroy Syiemiong bad Bah Mickey M Nongsiang, Working President CEC ki la pynpaw ïa ka jingsngewkhia kaba jur ïa ka jingnang bun jong ki khyrdop lum pisa ha shi lynter ka surok Riangdo-Athiabari ha West Khasi Hills wat hadien ba ka seng naduh ki bnai ba la lah kala dep ban ujor sha ki bor district.
Haba kren ha ki lad pathai khubor ha ka sngi Balang halor kane ka bynta, u Bah Newsonroy Syiemiong u la kam ba ka seng lyngba ki dkhot ha kine ki khyndiat sngi ki la leit ban peit bad jurip bad katkum ka jinglap, ki khyrdop lum pisa ki la bun palat ha katei ka surok kynthup kiba dei jong ka KHADC.
U la ong ruh ba ka seng ka dap da ka jingsngewkhia bad halor kane ka CEC kala leit ban ïakynduh ïa ka DC halor ka jingplie ïa ki khyrdop lum pisa kiba la khang, khlem kano-kano ka jingpyntip lem sha ka seng kaba la shimkhia bad ki ophisar jong ki tnad treikam ban khang shwa ïa ki haduh ba ki la lah ban ai ka jingpynshai bad ki kot ki sla kiba biang.
U la ong ruh ba kumba long mynta ka seng ka lap ba ki bor ba dei peit, ki la ïaid lait ïa kane ka bynta na kata ka daw ka seng ka pynpaw ka jingsngewkhia bad lehse ka lah ban don kaei kaei sha lyndet, ha kaba na ka liang ka seng kan sa shim ïa ka bynta ban wad bniah ba balei hap ban don haduh kat kitei ki khyrdop lum pisa.
U la ong ruh ban pynthikna shuh shuh ïa kane, na ka liang ki nongïalam ka CEC ha ka sngi Ba-ar ha ryngkat bad ki nongïalam jong ka Mawshynrut Circle kila leit ban jurip, la lap ba ha katei ka surok ki don kumba lai tylli ki khyrdop na ka bynta ki bar jylla (non-tribal gate) ha kaba kane ka pynlyngngoh shuh shuh ïa ka seng ba kumno ha kajuh ka surok hap ban don haduh lai tylli ki non-tribal gate, kaei ka jingmut. Na ka liang ka CEC halor kane ka bynta ka kyntu ïa ka shnat treikam jong ka seng ha Mawshynrut ba kin peit bha ïa kane bad ha ka jingjurip hi nalor kitei ki lai tylli ki non-tribal gate ki don ruh kiwei-kiwei kumba 8 haduh 9 tylli, ong u Bah Newsonroy.
“Ngi pynpaw ruh ïa ka jingsngew lyngngoh haba ngi peit ha baroh ka Khasi Hills ba ym pat ju don kat kine ki khyrdop ha baroh shilynter jong ki surok bad ngi lap ba dei tang ka surok Riangdo – Athiabari ba ki don bun tylli ki khyrdop lum pisa,” u la ong.
Shuh shuh u la ong ruh ba ka seng ka kyntu ïa ka KHADC lyngba u CEM ba un shimkhia ïa kane bad ka kyntu khamtam eh ba kin weng noh ïa kitei ki non-tribal gate ar tylli bad ïa kiba dei ban buh ha katei ka surok ka seng ka kwah ba ki dei ban biang ïa ki kot ki sla.
U la ong ruh ba ka seng ka kyntu ïa baroh ki briew kiba buh ïa ki khyrdop lum pisa ha shi lynter katei ka surok ba kin pynbiang ïa ki kot ki sla ki jong ki, bad kumba la lap ha ka jingjurip kiba bun kim lah ban pyni ïa ki kot ki sla hynrei na ka liang ka seng kan sa ïai buddien ïa kane bad kan sa leit ruh ban ïakynduh ïa u CEM.
U Bah Banlang Sohpoh, President Mawshynrut Circle pat u la ong, ka jingsngewkhia ka long ba naduh ba sdang la kren shai ba ka dei ka jingeh jong ki paidbah ka thaiñ bad ka dei ka khia ka shon kaba ban ïa ki paidbah ha ka kit ka bah ha ka khaïi ka pateng.
“Hooid na ka liang ki bor district shipor ki la khang, hynrei ka seng ka kren shai ba lada phi biang ki kot ki sla ngin nym pynthud bad ngin nym knieh ïa kata ka kam bylla hynrei ban ïaid katkum ki lynti ba dei ban ïaid,” ong u Bah Banlang bad bynrap ba ka KHADC ruh ka dei ban ai ka jingpynshai ba balei lah ban buh ïa kitei ki khyrdop haduh 8 lane 9 tylli ha kajuh ka surok.
