Bhubaneswar, Naiwieng:
Ka Odisha ka la pan jingïarap pisa ba nyngkong eh kaba T.2,526 klur na ka sorkar pdeng na ka bynta ban ïarap mardor, pynbha bad shna thymmai ïa ki jingtei kiba la shah pynjulor ha ka erïong Arnab bad hadien kata ka jingshlei um ha ki distrik Ganjam, Gajapati bad Kandhamal.
Ka jylla ka la dawa ruh ïa ka song tyngka kaba kyrpang kaba T.10,000 klur na ka bynta ki lad ki lynti kiba jrong por ban weng ïa ki jingeh kiba ju wan man ka por bad ki jingeh kiba ïadei bad ka jingshlei um ha ki lai tylli ki distrik.
Ïa kane la pyntip da u Special Relief Commissioner u Rajesh Prabhakar Patil ha ka sngi Palei jong ka taïew ba la lah hadien ka jingïalang pynkut jong ka kynhun hapdeng ki Myntri ka sorkar pdeng bad u Myntri Rangbah ka jylla u Mohan Charan Majhi ha Lok Seva Bhawan.
U Patil u la ong ba ka sorkar jylla ka la pan jingïarap napdeng na ka bynta ka jingïarap bad pynthymmai kloi bad kumjuh ruh ki jingtei kiba neh ban pynduna ïa ka jingktah jong ki jingjia basngewsih kiba ju jia man ka por kiba pynsah ïa ka Ganjam distrik ha ka jingpyrkhat namar ba ka la mad ïa ka jingshah pynjulor kaba khraw tam.
Ka sorkar kan aiti ïa ka jingthoh sha ka tnad kam pohïing jong ka sorkar pdeng hadien ba la pynïasohlang ïa ki kaiphod jingjulor na baroh ki tnad.
Ka kynhun jong ki 8 ngut ki dkhot jong ka Central inter-ministerial team (IMT) ba la ïalam da u Ravi Shankar, Joint Secretary ha ka tnad kam pohïing ka ri, kaba la leit jngoh ïa ki jaka ba shah ktah ha ka 3 bad 4 tarik u Naiwieng ban bishar ïa ka jingheh jong ka jingjulor ka la pynlong ïa ka jingïakren bad u Myntri Rangbah ha katei ka sngi.
U Majhi u la ïathuh ha ka kynhun pdeng ba ki kam pynroi jong ka Odisha ki ju shah pynthut ha ki erïong, ki jingshlei um bad ka jingshit.
U la kyntu ïa ka kynhun ban ai jingmut ïa ka jingïarap ym tang na ka bynta ka jingïarap bad jingtei biang mardor hynrei wat na ka bynta ki lad ki lynti kiba neh ban tei ïa ki jingtei kiba lah ban ïaleh pyrshah ïa ka erïong bad ka jingshlei um bad ban pynduna ïa ka jingduhnong ha ki por ban wan.
U Shankar u la ong ba ka kynhun ka la sakhi ïa ka jingjulor kaba jur ha ki jingleit jngoh ïa ki jaka, khamtam ha ka distrik Ganjam, ha kaba ki um ba tuid na ka wah Rushikulya ki la pyllang ïa u shyiap bad ka ktieh ha ki jaka rep, ki surok, ki ïing bad ki ophis sorkar. Watla bun ki ïing kim shym la twa, hynrei katto katne ki la shah pynjulor ha ka jingtei.
U la ban jur ïa ka jingdonkam ban pynkhuid ïa ka wah Rushikulya ha ka por ba jrong ban weng ïa ka jingeh kaba ju wan biang. Ka kynhun ka la peit ruh ïa ka jingjulor jong ki jingthung jingtep, ki surok, ki jingkieng, ki jingtei bording, ki jingker wah, ki wah, ki jaka ai um dih, ki pung dohkha bad ki marpoh khyndew. Ka jingpynkhlaiñ bad pynkiew ïa ki jingker wah bad ki wahduid ruh ka la don bynta ha ki jingïakren.
Ka kynhun pdeng ka la ong ba ka jingpeit bniah ïa ka jingjulor kan shim por sa hynriew haduh hynñiew sngi bad ka la ai jingmut ïa ki bor synshar distrik ban pynlong ïa ka jingjurip ïa ki ïing ki sem ban pynthikna ïa ka jingbishar bniah ïa ki jingduhnong.
Shwa kane, u Chief Secretary u Anu Garg u la pynïaid ïa ka jingïalang bishar bniah ba nyngkong, ha kaba ka SRC ka la aiti ïa ka kaiphod bishar bniah ba nyngkong jong ka jylla katkum ki jingai jingmut na ki tnad bapher bapher.
