Vijayawada, Naiwieng:
Ka sorkar Andhra Pradesh, ka la pynkhlaiñ ïa ki lad jingïada ban ïada na ka jingsaphriang jong u khñiang jingpang Ebola, ha kaba ki jingpynbeit ïa ka jingpeit bniah la pynlong ha ki lai tylli ki kad liengsuiñ jong ka pyrthei bad lai tylli ki kad liengsuiñ ha ka jylla.
U Secretary (Health) u G Veerappandian u la pyntip sha ka tnad ka koit ka khiah jong ka sorkar pdeng ha ka taïew ba la lah ba la buh ïa ki kynhun sumar ba la pynkhreh ban peit bniah ïa ki nongleit nongwan kiba suba ba ki don ïa ki dak jingpang Ebola ha ki kad liengsuiñ Tirupati, Bhogapuram bad Vijayawada. Kumjuh ruh la pynbeit ha ki kad lieng jong ka Visakhapatnam, Kakinada bad Nellore.
Yn pynlong ïa ka mock drill ha baroh kawei ka jylla ha ka 12 tarik u Naiwieng ban bishar bniah ïa ka jingpynkhreh ha ka jylla. U Veerappandian bad u Health Commissioner u Chakradhar Babu ki la batai ïa ki lad ki lynti.
Ki heh ophisar ki la ïathuh ba ïa ki nongmuna ba suba ba ki don ïa ki khñiang jingpang lah ban test ha ICMR-National Institute of Virology ha Pune bad ha ki Viral Research and Diagnostic Laboratories kiba don ha Andhra Medical College ha Vizag, SVIMS ha Tirupati bad ha Government Siddhartha Medical College ha Vijayawada.
Ha kajuh ka por, haduh ka 31 tarik u Risaw, 2026, ki san tylli ki ri, ki la don 10,498 ngut kiba ïoh ïa ka jingpang bad 5,107 ngut kiba ïap. Ka Democratic Republic of the Congo, ka don 10,467 ngut kiba ïoh ïa katei ka jingpang bad 5,103ngut kiba ïap, katba ha Kenya, ki don 9 ngut kiba ïoh pang bad arngut kiba ïap, ha Uganda, ki don 20 ngut bad arngut kiba ïap, ha Nigeria, ki don 1ngut bad kiba ïap 2 ngut.
