Shillong, Naiwieng 11
U Bah Sanbor Shullai uba dei u Myntri ka Sorkar Jylla bad MLA ka South Shillong Constituency ha ka sngi Balang u la ong, ka jingïakhih pyrshah ïa ka Shillong Peak Ropeway Project ka dei ka jingleh politik bad kynnoh ba ka Joint Action Committee (JAC) ka la wanrah da ki briew na kiwei pat ki seng saiñpyrthei ban pynmih ïa ka jingklumar.
Haba kren hadien ka jingïalang kaba la dep lum da ka South Shillong Advisory Committee, ïa kaba u la pynïaid hi, u Bah Sanbor u la ong, ka JAC kala khot ïa ki briew kiba nabar ka konstitwensi ha ka jingïalang kaba dei thik tang na ka bynta ki 26 tylli ki kynhun ka thaiñ.
“Ka jingïalang kaba nga la khot ka dei na ka bynta ki 26 tylli ki kynhun kynthup ïa ki Dorbar Shnong bad ki seng kiba hapoh jong ka shnong, hynrei ka JAC kala khot bad ïawer da ki briew kiba nabar suda,” ong u Bah Sanbor.
U Bah Sanbor u la ong, “Mar ïa rung ha ka jingïalang, kila don ki longkmie ki bun bha. Nga kylli ïa ki shaei ki sah, kila ong ba ki dei na Nongmensong, Malki, Lawsohtun bad Polo. Kumta ka pyni ïa ka jingthmu jong kitei ki briew ban pynmih ïa ka huri hura, kumba kila leh ha kiwei-kiwei ki jaka”.
“Kum u MLA ka thaiñ, ngam sngew eiei hynrei kila bun palat ki nongkynshoit. Kane ka dei ka jingleh buit politik, ka jingkynshoit politik da ki dkhot kiba na ki seng saiñpyrthei ki bapher-bapher,” u la bynrap.
Haba kylli la ki dkhot ka JAC ki dei kiba don bynta bad kino-kino ki seng saiñpyrthei, u Bah Sanbor u la jer kyrteng ïa ki arngut.
“Hooid, namar ba ha ka ilekshon kaba la dep ha u snem 2023, ka Kong Venetia Mawlong, kaba dei ka Executive Member jong ka JAC, kala ïakhun na ka Congress,” u la ong.
“U don sa uwei, ngam kynmaw bha ïa ka kyrteng hynrei u dei na Lawsohtun bad u dei na ka jait Rynjah, u la ïakhun ïa ka ilekshon MDC na ka KHNAM bad ki don ruh bun ki dkhot jong kiwei kiwei ki seng saiñpyrthei,” ong u Bah Sanbor.
Haba kylli la ka don kano-kano ka jingpyrshang ban ktah kti ïa u ha ka por ba u la mih noh na ka jingïalang, u Bah Sanbor u la ong, ba um lah ban pynthikna paka ïa kane, hynrei u la kdew pat ïa ki video kiba la saphriang ha ki rynsan social media.
“Ïa kata ngam lah ban ong eiei, hynrei phi la ïohi ha ki rynsan social media, ki la sdang kumba kila leh ha ki taïew kiba la dep, ki leit ban hylla bad sdang ban thombor ïa ki Dorbar Shnong, Rangbah Shnong kumba phi la ïohi,” u la ong.
U Bah Sanbor u la ong, katei ka jingïakhih kan ym ktah eiei ïa u ha ka ilekshon ban wan bad u la ong, ba ha ka ilekshon ban wan un dang jop bun shuh shuh.
“Ha kaba kut hi ka sngi, ha ka ilekshon kaba la dep nga la jop da 13,000 vote, ha ka ilekshon ka ban wan, ngan jop syndon da palat 20,000 vote,” u la ong.
Haba kyrshan ïa ka Ropeway Project, u la ong ba ka Raid Laban Dorbar Pyllun mynshwa kala kyrshan namar ba kan dei ka lad ban pynmih ïa ka ïohkam ïohjam.
“Ha katei ka por, ka Raid Laban Dorbar Pyllun, kala tip ba lyngba ka Ropeway kan plie lad ïa ki samla ka thaiñ ban ïohkam ïohjam (Technically and Non-Technically),” u la ong bad bynrap “Kin don ruh bun bah ki dukan, kaba ki trai shnong kin ïoh ban plie ïa ki dukan ki bapher-bapher bad kan ai jingmyntoi ruh ïa kiba kamai ñiah kali, kumba kala jia ha kylleng ki bynta jong ka ri India bad ha kiwei ki ri ruh”.
U la ong ba ka Sorkar mynta kan hap ban shim ïa ka rai kumno ban ïaid shakhmat.
“Mynta, nga tharai ka Sorkar ka hap ban khmih bniah kumno ban ïaid shakhmat bad kane ka projek,” u la ong.
