Shillong, Naiwieng 11
Ka jinghap u phria uba rben bad u slap ka la pynlong ïa ki kali ban sahkut shipor ha Shillong namar la tap ïa ki surok.
La ïohi ba ka jaka ïeng kali ha Umsohsun ka ban kiew sha Dreamland ka la kylla jaka shondur namar ki don ki samla ki la ïa shondur sngewtynnad namar kim ju ïohi kum une u phria uba rben ban hap ha Shillong.
Ka jingrben u phria ban hap ha jaka ïeng kali ha Umsohsun ka la pynsahkut lut ki kali kiba ïeng namar kim lait mih shuh. La ïohi kylleng ka Shillong ki briew ki la mih sha surok ban shondur ban ktah ïa u phria uba rben uba tap ïa ka surok. Ka jinghap u phria bad u slap ha Shillong ka la sdang naduh ka por 11:15 baje mynstep mynta ka sngi Balang.
Nangta ki kali kiba ïaid ha Mission Compound syndah ka kynroh Madan Student Jaiaw ki la sahkut namar ka jingrben u phria uba lang hapdeng surok.
