Imphal, Naiwieng:
Ki pulit ka Manipur ki la ïathuh ba u Paoginlal Hangsing bad u Tinginlun Chongloi, kiba dei ki arngut ki nongshong shnong jong ka shnong Taphou Kuki kaba don ha Senapati District, ki la shah rahbor hashwa ban ïoh sei ïa ka met jong ki na kawei ka jaka kaba don khlaw ha shilynter jong ka surok Senapati-Paibung.
Haba kren sha ki lad pathai khubor ha ka 10 tarik Naiwieng, u ADGP (Law and Order) u Lhari Dorjee Lhatoo u la ïathuh ba ïa kine ki arngut la ïohi khatduh hajan ka shnong Maranmai kaba hap ha Senapati distrik.
U la ong ba ki pulit mar mar ki la mudui da ka ejahar, ki la eksamin ïa ki sakhi bad ki la kylli jingkylli ïa kiba bun ki briew hadien katei ka jingjia.
Hadien kata la pynlong ïa ki jingkhynra ba jur hapoh ka jingpeit jong ki heh ophisar, ha kaba ki kynhun ba ïatreilang jong ki pulit ka Manipur, CRPF, CoBRA, BSF, Assam Rifles bad ki shipai.
“Ïa ki metïap jong ki arngut kiba la khlad la sei na kawei ka jaka kaba don khlaw ha shilynter jong ka surok Senapati-Paibung, kaba jngai kumba 14 kilomitar shaphang mihngi jong ka surok bah National Highway 2,” ong u Lhatoo.
U la bynrap ruh ba ka jingwad bad jingtohkit ka dang ïaid shakhmat man ka sngi ban ïoh kem ïa kiba donkti.
