Bhubaneswar, Naiwieng:
Ka kynhun ba heh na ka Tottori Prefecture jong ka Japan ba la ïalam da u Lat ka jylla u Shinji Hirai kan leit jngoh ïa ka Odisha naduh ka 10 haduh ka 12 tarik u Naiwieng ban wad ïa ka jingïatreilang ha ki karkhana, ka khaïi pateng, ka jingbei tyngka, ka jingpynroi ïa ki sap ki phong, ka kam jngohkai pyrthei bad ka kolshor.
U Myntri ka tnad karkhana, ka jingpynroi ïa ki sap ki phong bad ka pule puthi, u Sampad Chandra Swain, u la ïathuh ba u Lat ka jylla u Hirai un don ka jingïalang arliang mamla bad u Myntri Rangbah ka jylla u Mohan Charan Majhi na ka bynta ban tei ïa ka jingïatreilang kaba jrong ha ka tnat treikam bad ka kam khaïi hapdeng ka Odisha bad ka Tottori.
Ka jylla kan sa ïasoi ïa ka jingïateh paralok bad ka jingïatreilang bad ka Tottori Prefecture ha ka State Convention Centre ha Bhubaneswar ha ka 11tarik Naiwieng.
Kane ka jingïateh kan thaw ïa ka phang pdeng ban ïatreilang ha ka ïoh ka kot, ka kam jngohkai pyrthei, ka kolshor, ka mariang, ki briew bad ki samla.
Ar tylli ki Institution MoU ruh la buh por ban ïakylliang, kawei hapdeng ka Startup Odisha bad u Director jong ki karkhana, Tottori bad kawei pat hapdeng ka World Trade Centre bad ka Tottori prefecture, ong u Swain.
Kane ka kynhun kan kynthup ïa u Chief Secretary u Tottori u Toshiki Endo, ki heh ophisar, ki dkhot jong ka ïingdorbar jong ka Prefectural Assembly, ki nongmihkhmat jong ki kam khaïi bad ki samla pule.
Kine kin leit jngoh ïa ka Startup Odisha kaba don ha O-Hub, ka Central Tool Room and Training Centre bad ka jaka shna kali Indo-Nissan ha Khurda.
