Shillong, Naiwieng 11
Ka Joint Action Committee Against Shillong Ropeway Project mar ïa wan na ka jingïalang kaba la khot pynlong da u MLA ka Laban Constituency u Bah Sanbor Shullai ka la shim ïa ka rai ban tur sha Secretariat ha ka sngi kaba bud kata ha ka 12 tarik Naiwieng, 2026.
Ka Kong Deborah Marbaniang President ka JAC, ka la pynpaw ba ka JAC ka la pynbeit ba kan leit tur da kaba jai-jai sha Secretariat ha ka sngi Palei bad kane ka rai ka long hadien ba ki la mih khlem jinghun na ka jingïalang ba la khot da u MLA ka Laban kaba la long ha ka Sngi Balang ha State Convention Centre, Shillong.
“Ngi na ka JAC hi ngi ïengskhem ha ka nongrim ba dei ban pyndam noh ïa ka projek Shillong Ropeway ha u Lum Shyllong bad ban pynkynriah sha kiwei ki jaka, lada ym dei kumta kane ka jingïakhih jong ngi kan dang ïai bteng nangne shakhmat” ka la ong.
Ka la kyntu bad ka la khot la wer ïa ki paidbah nongshong shnong ba na kylleng ba kin wan ban ai ka jingkyrshan ha kane ka jingïaid kjat ba jai-jai bad ban ai ka jingkyrshan ha kane ka jingïakhih kaba ktah ïa baroh ki nongshong shnong jong ka Nongbah Shillong.
Kum ban shu kdew ka JAC ka la sdang ïa ka jingïakhih ha mot Kiang Nongbah naduh ka 6 tarik Naiwieng 2026 kaba la ïaid mynta la hynriew sngi san miet eiei, halor ka nongrim ba dei ban pynduh ïa ka project Ropeway ha u Lum Shyllong.
