Shillong, Naiwieng 11
Ka jingther jong u slap ba jur ryngkat bad u phria ha nongbah Shillong ha ka por shiteng sngi eiei jong ka 11 tarik mynta u bnai, ka la pynpaw pyrthei ba wat ka Secretariat kaba dei kawei na ki jaka treikam kaba kongsan tam jong ka Sorkar, kam shym la lah ban shan ha kaba la sakhi ïa ka jingpei bad jaw um jrop jrop. Ha ka sngi Balang, ki nongleit nongwan ki la sohsat shi katdei eh ha ka leit ka wan hadien ka jingwan ther kynsan jong u slap ba jur bad bud pat sa da ka jinghap jong u phria kaba la tap da ka dur rong lieh ïa kiba bun ki bynta jong ka nongbah Shillong, la long thik kum sha Shimla ne Kashmir.
Katkum ka durkhih (video) kaba la saphriang, la ïohi ïa ki nongtrei kiba hap ban pynkynriah bad lum ïa ki file na ka bynta ban lait na ka jingjhieh um, katba kiwei pat ki la hap ban buh da ki borti hapoh kamra bad halor miej ban pdiang ïa ka um slap kaba hap bad jaw na ka tnum ha kawei na ki kamra treikam. Kane ka jingjia ka la pynmih ïa ka jingkylli halor ka jingpynneh pynsah ïa ki jingtei Sorkar, khamtam eh ïa ka Secretariat kaba dei ka jaka treikam kaba kongsan jong ka Sorkar Jylla.
Ka long kaba lyngngoh ba katba ki kamra jong ki MLA bad ki Myntri Sorkar pat ki thaba khriak naba la maramot bad pynbha manla ka por, kiwei pat ki kamra treikam jong ki ophis Sorkar ki dang hap ban mad ïa kum kine ki jingeh, haduh ba ki nongtrei ki hap ban pyndonkam da ki borti ban lum ïa ka um slap bad pynkynriah ïa ki file ïoh ba kin jot. Kane ka pynmih ïa ka jingkylli, hato ka Secretariat Affairs Department kam shym la peit bniah ïa ka jinglong jingman ki kamra treikam hapoh Secretariat bad balei ka jingpynbha ka long tang ïa ki kamra treikam jong ki MLA bad Myntri Sorkar.
