Jowai, Naiwieng 11
U President ka Meghalaya Pradesh Congress Committee (MPCC), u Bah Vincent H. Pala u la pynpaw ïa ka jingsngewkhia halor ka Foreign Contribution (Regulation) Act (FCRA), ka Uniform Civil Code (UCC) bad ki aiñ pyrshah ïa ka jingpynkylla niam, da kaba kynnoh ba kine ki lah ban ktah ïa ki hok jong ki Khristan bad ki riti dustur jong ki jaidbynriew trai ri.
Haba kren ha ka jingïalang ïalap ilekshon sha ka Shillong Lok Sabha By Election ha Ladthadlaboh, Jowai ha ka janmiet 10 tarik Naiwieng, u Bah Pala u la ong, ka FCRA ka dei ka aiñ kaba sniew tam namar ka lah ban khanglad ïa ki kam shakri paidbah jong ki kynhun niam, ka rukom mane Blei bad ki kam ïalap niam.
U la kdew ba ki Khristan ha India ki don ïa ki jingdon jingem kiba kot sha ka T.25 lak klur, kynthup ïa ki ïingmane, ki hospital, ki skul, ki jaka ri khunswet bad ki training centre.
Nalor ka FCRA, u Bah Pala u la maham ruh halor ki aiñ pyrshah ïa ka jingpynkylla niam (Anti-Conversion Laws), da kaba ong ba 12 tylli ki Jylla ki la dep ban pyntreikam ïa la ki jong ki aiñ. U la kynnoh ba palat 700 ngut ki nongïalap niam bad ki riew niam ki la shah kem hapoh ka shisnem.
U la ong ba kine ki aiñ ki khang ïa ka jingpynkylla niam lyngba ka jingshah pynbor, ka jingkular kam ne ka jingïathoh shongkurim. Wat ïa kiba kwah ban kylla niam da la ka mon ruh, u la ong, ki hap ban pan jingbit 60 sngi shwa.
Haba kren halor ka UCC, u Bah Pala u la ong ba ka jingeh ka mih khamtam ha ka rukom pynlong ïa ka jingïathoh shongkurim, namar katkum ka jingthmu, ki nongshongkurim kin hap ban register ïa ka jingïathoh shongkurim hakhmat ki Deputy Commissioner (DC), ym shuh hakhmat ki nongïalam niam.
U la buh jingkylli ruh halor ka rukom ai bynta ïa ka spah ka phew, da kaba kdew ba ha Meghalaya ka khun khatduh ka ïoh bynta ïa ka jinghiar pateng, katba ha ka rukom jong ki Hindu, u khun shynrang ba nyngkong u ïoh bynta. U la ong ba ka jingkylli ka long la ki jaidbynriew trai ri kin bud ïa ka rukom jong ki Hindu ne kin pynneh ïa la ki jong ki riti dustur.
U Bah Pala u la pynpaw ruh ïa ka jingsngewkhia halor ka jinglah jong ki briew kiba don ïa ka kyrdan Scheduled Tribe (ST) ban duh ïa ki hok ba ïadei bad ka bhah kyrpang lada ki kylla sha ka niam Khristan ne kiwei pat ki niam.
Haba phai sha ka ilekshon MP shiteng samoi, u la ong ba watla kam dei ka ilekshon kaba donkam eh, hynrei ha kane ka por ka donkam ka jingïada ïa ki hok jong ki Khristan. U la ong ba tang ka Congress kaba la pynkhreh ban ïada ïa kine ki hok.
U la kynnoh ruh ïa ka Sorkar BJP halor ka jingpyrshang ban pynlong ïa India kum kawei ka ri, kawei ka ktien bad kawei ka niam. U la pynkynmaw ïa ka por ba la wanrah ïa ka Citizenship (Amendment) Act (CAA), da kaba ong ba u Conrad Sangma u la pyrshah ïa ka ha kaba sdang, hynrei hadien u la kyrshan ïa ka Bill.
U Bah Pala u la kyntu ïa ki paidbah ba kim dei ban shah pynngop tang ha ki jingkular jong ki nongïalam saiñ pyrthei, hynrei ban bishar ïa ka jingshakri jong ki. U la ong ba bun ngut ki MLA kiba la mih na ka Congress bad ïasoh sha kiwei ki seng bad ki la kylla seng biang hadien ba kim shym la ïoh ïa ka jingmyntoi kaba ki khmih lynti.
“Nga la don 15 snem ha ka Congress. Nga kwah ba ka jingshakri jong nga kan long kaba myntoi ïa ki paidbah, ym na ka bynta ka jingmyntoi shimet ne ka ïing ka sem jong nga,” la ong u Bah Pala.
