Shillong, Naiwieng 11
Hadien ba mih ka jingkynnoh na u Bah Sanbor Shullai ba ka jingpynwai noh ïa ka jingïalang bad ka JAC lem kiwei ki kynhun ka dei namar ba ki la shu kyrkait, na ka liang ka Kong Olivia Lyngdoh, dkhot ka JAC ka la pynphai nia halor katei ka jingkynnoh.
Haba kren sha ki lad pathai khubor ka Kong Olivia ka la ong ba kum ka JAC ka la leit sha katei ka jingïalang da kaba jai-jai bad ki paidbah ki la sngap ïa ka jingpynshai jong u Bah Sanbor uba la pynsngew ha ki ïa ka Resolution, hynrei haba u Bah Sanbor u la ai ka por ban kren ïa ki paidbah, u khlem lah ban sngap ïa ka jingshisha.
Ka la kynnoh ba haba ai jingkren ki paidbah u Bah Sanbor u phah ban pynkloi ïa ka jingkren bad khlem ailad ban pynjrong ïa ka jingkren, “Haba ngi leit sha ka jingïalang ban ïakren ban ïoh ïa ka jingshai ngim lah ban kren tang shiteng, ban mih na katei ka jingïalang khlem ka jingshai” ka la ong.
Ka la ong ba haba dang kren ar ngut ki nongïalam jong ka JAC, u Bah Sanbor u la ïeng syndet bad ong ba ka jingïalang ka la wai ha kaba u la mih syndon na ka jingïalang, ka la kynnoh ba ka jingphet noh u Bah Sanbor kum u MLA na ka jingïalang ka long ka jingtieng, ka jingrem bad ka jingbymlah ban sngap ïa ki jingshisha ba la kren da ki dkhot jong ka JAC.
Shuh-shuh ka la kynnoh ba ka jingkhot jong u Bah Sanbor sha ka jingïalang ka long tang ban ibeiñ ïa ka JAC bad baroh kiba wan sha ka jingïalang khlem da don kano-kano ka jingmut ban ïakren ban ïapynbeit ïa ka jingdawa.
