Shillong, Naiwieng 12
Ki nonghikai kiba don hapoh ka shatri jong ka Khasi Jaiñtia Deficit School Teachers’ Association (KJDSTA) ki pynpaw ba ki sngewsih sngewdiaw bad dap ka jingkhuslai mynsiem ba ki hap ban ïeh ïa ki khynnah ha ki kamra klas tang namar ba ki hap ban mih madan ban ïakhih ban dawa ïa ka hok jong ki.
Haba ïoh ban ïakren ïa ka Kong Elveryne Thangkhiew kaba dei ka nonghikai Deficit, kaba long ka ruh kum ka Treasurer jong ka KJDSTA Mawlai Zone, ka la ong ba ka kwah ban pynsngew sha ka Sorkar kumjuh sha ki kmie ki kpa jong ki khynnah skul, ba ki nonghikai ki leit sha ka jingïakhih da ka jingsngewsih sngewdiaw, “Hooid ka met jong ngi ka don ha ka jaka ba ïakhih katba ka mynsiem jong ngi ka don ha ki kamra klas ban donlang bad ki khynnah, ngi khuslai ngim kwah ban shu ïeh ïa ki khynnah khlem nonghikai ha ki kamra klas” ka la ong.
Haba ïadei ka jingleh ka Sorkar ïa ki nonghikai Deficit, ka Kong Elveryne ka la ong ba ka Sorkar ka leh ïa ki nonghikai la kum ki khynnah rit da kaba shu pynbiej da kumne kumtai haba ïadei ka Dearness Allowance (DA) ba ka Sorkar ka la kular ban ai ha shuwa ban kut ka shuti puja bad kham hadien ka shu ai daw ba ka jingpynlait ïa kane ka pisa ki nonghikai ka jingpynkreh ka dang ïaid.
“Dang mynnin ka Sorkar ka ju ong ba ka jingkhang ka plie 24 kynta ban ïakren ïa ki jingeh ki nonghikai, hynrei nangno ngin rung bad ka jingkhang kaba kumno ngin rung, naba kam pat ai shisien ruh ïa ka jingtip ba thikna ban don ka jingïakren ban ïakynduh, lano bad haei ban ïa kynduh” ka la kynnoh.
Ka la pynpaw ba ki nonghikai Deficit bad ka KJDSTA ki kwah ïa u Myntri Rangbah ka Jylla ba un khot ïa ka jingïakren namar ki long kiba kloi ban pdiang ban don ka miej jong ka jingïakren bad ban pynbeit ïa kine ki jingkynrum kynram.
Shuh-shuh ka la ong ba ka jingïakhih ki nonghikai Deficit mynta kam dei eh tangba ki pyrkhat ïa ka pisa, hynrei ka dei ba ki pyrkhat ban pynbha, ïada ïa ka Deficit System ha ka Jylla bad ka lawei jong ka pule puthi ha ka Jylla.
“Lada ka Sorkar kam suidñiew ïa ka kam jong ki nonghikai, ngi don ka jingduh jingkyrmen ba shaei ka lawei jong ki khynnah pule kan poi bad ka pule puthi jong ka Jylla baroh kawei” ka la ong.
“Lada ka khyllem ka pule ka dangle ka jaidbynriew baroh kawei ruh kan khyllem, khamtam lei ka jaidbynriew Khasi kaba dei kaba ritpaid, lada ma ngi ngim ïeng mynta ka la dei kaba kut noh jong ka kam hikai ha ka Jylla” ka la ong.
Ban shu bynrap ka KJDSTA ka sdang ban pynlong ïa ka jingïakhih ba khlem buh por naduh ka 11 tarik u Naiwieng bad mynta ka dei ka sngi ba ar ba ki nonghikai Deficit kim leit ban hikai ïa ki khynnah ha ki kamra klas.
