Shillong, Naiwieng 12
Ka Sorkar Meghalaya kan nym pyndam satia lane ban pynkynriah ïa ka projek Shillong Ropeway tang halor ka nongrim jong ka jingtieng kaba khlem don, ong u Symbud Myntri Rangbah ka Jylla uba dei peit ïa ka tnad Kam Pohïing Bah Prestone Tynsong ha ka sngi Palei, wat haba u dang plie ïa ka jingkhang na ka bynta ki jingïakren ba thymmai bad ki nongïakhih. Haba kylli halor ka Joint Action Committee (JAC) kaba pyrshah ïa katei ka projek da kaba pynlong ïa ka jingïakhih hakhmat ka Secretariat bad hato ka Sorkar kan khot ne em ïa ki ban ïakren, u Bah Prestone u la ong, ka Sorkar kam shym la khang satia ïa ka jingkhang.
“Ka jingkhang ka plie beit. Na ka liang jong ngi, naduh ka sngi kaba nyngkong, la dep pynlong jingïalang ym duna ïa ka 3-4 sien”, u la ong bad bynrap “Ka jingkhang ka dang plie. Lada ki kwah ban ïakren biang, ngi don hangta.”
“Ka shong ha ki, lada ki kwah ban ïakren shuh shuh, ka jingkhang ka plie bad ngi long kiba kloi ban ïakynduh ïa ki, hynrei ym da kane ka rukom. Phim lah ban shu ong, ïa ngin ïa tur sha Secretariat”, la ong u Bah Prestone.
“Nga kwah ban kyrpad ïa baroh, ka Sorkar ka plie beit, ngi long kiba pdiang sngewbha. Lada phi kwah ïa ka jingïakren, ngi long kiba kloi ban ïakren kham bniah shaphang kino-kino ki mat namar ngi kwah ba baroh ngin ïa ïaid lang ha kajuh ka bynta,” u la ong.
“La ka long ka projek kaba heh ne ka projek kaba rit, ha kaba kut ka dei na ka bynta ka jingmyntoi jong ki paidbah ka Jylla. Kam dei na ka bynta ka jingmyntoi jong u Bah Prestone ne u Conrad ne u Bah Sniawbhalang, ka dei na ka bynta ka jingmyntoi jong baroh kiba don hangne ha Meghalaya”, u la bynrap.
Halor ka jingdawa jong ka JAC ban pynduh pyndam ne pynkynriah noh ïa ka projek, u Bah Prestone u la kren shai: “Em. Halor kano ka nongrim? Kaei ka jingkam?”
U la ong ba ka jingsngewkhia jong ka JAC ka ïadei bad ka jingpynjot kaba lah ban long ïa ki tyllong um, ka jingpom dieng bad ka jingma ïa ka mariang.
“Ïa kane ka projek la sdang la slem bah bad ruh ki jingbishar bniah bad eksamin ba biang la dep leh lut. Ngi la khot ruh ïa ki riew shemphang ha ki bynta bapher bapher. Ki hi ki la leit bad peit ïa baroh ha ka jaka bad khatduh la aiti ïa ka kaiphod sha ngi,” u la ong.
“Shisien ba ngi la pyndep ïa baroh kita ki jingdonkam, baroh kine ki kyndon ba la buh lypa, ngi la ïoh lut ïa ki NOC bad hadien kata ngi la sdang ïa ki kam baroh”, ong u Symbud Myntri Rangbah.
Haba kylli hato ka jingïakhih ka dei kaba don jingleh bad myntoi saiñpyrthei, halor kane u la kyntait ban kynthoh eiei.
“Ngan nym kren eiei halor kata. La ka dei ka politik ne kam dei, ka mat, ka jingsngewkhia kaba ki don, nga sngewnguh ïa kata”, u la ong.
“Kum ki nongshong shnong jong ka Jylla, phi don ka hok ban pynpaw ïa kine ki mat bad ban pynpaw ïa ka jingsngewkhia jong phi. Ngi pdiang sngewbha ïa ka. Hynrei kaba kut, kaei ka jingshisha?” la kylli u Bah Prestone.
U la ong ba ka Sorkar ka la dep ban ai ïa ka jingpynshai kaba bniah halor kane ka projek.
“To ngin ïashong noh. Ngi la dep leh ïa ka presentation bad ka presentation ka long kaba bniah bha, ka long ruh kaba shai,” u la ong.
U Bah Prestone u la kyntait ïa ka jingkam ba ki tyllong um kin sa tyrkhong.
“Lada phi dang ïai ong, lada wan kane ka projek, ki tyllong um kin sa tyrkhong, nga tharai kata ka long kaba bakla. Phi donkam ban sngewthuh kawei, ka projek ropeway ka dei ka projek kaba ïadei bad ka mariang”, u la ong.
“Phi leit sha ka Sorkar India, leit sha kano-kano ka Sorkar Jylla, phin sa ïoh ïa kine baroh. Ka projek kaba bha tam kumba long mynta ha ka ri baroh kawei ka dei ka Ropeway, namar ka ïahap bad ka Ecosystem kaba ngi don,” u la bynrap.
