Shillong, Naiwieng 12
Ka Kong Dahun S. Lyngdoh (MCS) kaba dei ka magistor jong ka ophis Deputy Commissioner East Khasi Hills District ka la pyntip ba ka Joint Action Committee pyrshah Ropeway ka la pynkheiñ ïa ki kyndon ba la ai jingbit da ka ophis haba ki pan ban ïaid paidbah (rally) kaba jaijai hynrei haba ki la poi hakhmat Secretariat kim shym la ïaid shuh ki la ïeng hajuh.
Ka la pyntip ba ka ophis ka la ïoh ïa ka shithi na ka JAC ha ka janmiet jong ka 11 tarik mynta u bnai kiba la pan jingbit ban ïaid paidbah hynrei haba la ai jingbit ryngkat ki kyndon ka President jong ka JAC ruh ka la pdiang ïa ki kyndon.
Shuh shuh ka la pyntip haba ka jingïaid paidbah ka la sdang ha ka por 1:30 nohphai sngi hynrei haba ki la poi hakhmat ka khyrdop ka Secretariat kim shym la ïaid shuh.
Ban wanrah ïa ka shongsuk shongsaiñ ki bor district ki la shah ïa ki ban shong shipor hapdeng surok hynrei hadien pat ki la pyrta ba kin leit noh, hynrei don pat katto katne ki riew paidbah kiba la pyni ïa ka jingbitar ban bret ïa ki mattress bad khynñiat ïa ka jingker nar kaba la buh jingma ïa ki kali kiba ïaid ha surok.
Kumta ki magistrate bad ki pulit ki la ïoh ban pynpra noh ïa kine ki nongïakhih da kaba jaijai.
