Shillong, Naiwieng 12
Ki trai bad nongñiah bos hapoh ka shatri jong ka Khasi Hills Bazar Bus Association (KHBSA), ki la sdang ïa ka jingïakhih ba jai-jai da kaba pynlong ka jingsah miet ha ki bos ba la pynïeng ha ka jaka ïeng bos kaba don ha Ïew Mawlong. Kane ka jingïakhih da kaba sah miet ki trai bad nongñiah bos, ka dei ban pyrshah ïa ka jingthmu ka Sorkar ban pynkynriah ïa ki na kane ka jaka ban pynlong Ïew die madan.
U General Secretary ka KHBSA u Bah Kyrshan Rynjah u la pyntip ba ki nongñiah bos ki la sdang ïakhih ban pyrshah ïa ka jingthmu ka Sorkar Jylla halor ban pynkynriah noh ïa bos na kane ka parking kaba rim kaba ki ju ïeng naduh ki spah snem mynshuwa.
U Bah Kyrshan u la thalaiñ ïa ka Sorkar Jylla da kaba ong “Ka Sorkar Jylla ka kloi ban pynkynriah ne leh da ka bor ïa la ki jong ki paidbah, hynrei u la buh jingkylli balei ïa ki jaidbynriew Sikh na Them Ïew Mawlong kam lah ban pynkynriah”.
U la ong ba ka Association ka pyrshah beit triang halor kane ka rai ba ka Sorkar ka mut ban pynkynriah ïa ki bos sha parking Anjali, namar ka ktah ïa ka leit ka wan ki paidbah namar ka la kham jngai bad ka ktah khamtam ïa ka jingkiew dor ka bai kit bai bah sha ka parking thymmai.
U la ong ka Association ka dawa ba ka Sorkar kan hap ban pyrkhat ïa kane ka rai ba ka pynmih bad ka dawa ba kam dei ban ktah ne pynkynriah ïa kane ka parking.
U la ïathuh ba ki don haduh 41 tylli ki Shnong na ki thaiñ nongkyndong, ba kine bos ki ai ka jingshakri.
