Shillong, Naiwieng 12
U Bah Sanbor Shullai uba dei u Myntri Sorkar bad MLA ka South Shillong ha ka sngi Palei u la pynthikna ba la dep ban ujor da ka ejahar (FIR) ha thanad Laban halor ka jingjia ha ka sngi Balang ha ka jingïalang halor ka Ropeway bad u la ïada tyngeh ïa u briew ïa kaba ka Joint Action Committee (JAC) kala kynnoh ba u dei u “Gunda.”
U Bah Sanbor u la ïathuh ba ïa kane ka ejahar la mudui da u Pynhun uba dei ruh u dkhot, hadien ba ki dkhot ka JAC kila kynnoh ïa u da u “Gunda”. “Kila kynnoh ba u dei u ‘Gunda’, hynrei um dei satia,” ong u Bah Sanbor.
“Haba ki ong ‘Gunda’ ka mut ki hap ban pynshisha la u dei ne em uba don rikod ha ki pulit. Hynrei um dei satia u ‘Gunda’ kumba ki la kynnoh. U dei u nongïasaid aiñ,” u la ong.
U Bah Sanbor u la kyntait ruh ïa ka jingkam jong ka JAC ba utei u briew u dei u Personal Security Officer (PSO) jong u.
“Kila kynnoh ruh ba u dei u PSO jong nga, ka dei kaba bakla bad ka bym don nongrim. Ha ka jingshisha, u dei u nongïasaid aiñ,” ong u Bah Sanbor bad u la pynthikna ba katei ka ejahar ka dei pyrshah ïa ka JAC.
