Shillong, Naiwieng 12
Kawei ka longkmie kala ujor da ka ejahar sha ki pulit pyrshah ïa ki dkhot ka Joint Action Committee (JAC) ba pyrshah ïa ka Shillong Peak Ropeway Project, haba kynnoh ba kila kynthoh pynjah burom ïa ki Khun jong ka, hadien ba mih ka jingïania ha ka jingïalang ba pynlong da u Myntri Sorkar Bah Sanbor Shullai.
Ïa kane ka ejahar la mudui da ka Kong Ladaphila Kharbuli, ka nongshong shnong ka Lower Lumparing, Dong Ranab, Shillong, ha thanad Laban ha ka sngi Balang. Katkum ka ejahar la kynnoh ba ka JAC kala kynthoh pynjah burom ïa ki khun jong ka, Pynhunlang Kharbuli bad u Pyrsa kurim Anthony Marwein, ba ju ïatip kum u Bah Bun.
Katkum ka ejahar, kane ka kam kala mih na ka jingïalang bala pynlong ha State Convention Centre ha ka sngi Balang, ha ka por 5 baje eiei, kaba long hapdeng u Myntri Bah Sanbor bad ki nongmihkhmat ka JAC ban ïakren halor ka Shillong Peak Ropeway project.
Ka ejahar ka kynnoh ba hadien ba kut ka jingïalang, katto katne ki dkhot ka JAC kila pyrshang ban khang lynti ïa u Myntri ba un mih na kane ka jaka haba dawa ba un ai jubab.
Ka kam ba u Khun bad u Pyrsa kurim kila tuklar ban ai jingïada ïa u Myntri hadien ka jingïohi ba ki dkhot ka JAC kila leit tur da ka jingbitar sha u Myntri.
Ka ejahar ka kynnoh ruh ba hadien kane ka jingjia, ki lad pathai khubor kila pynmih ïa ki video kiba pyni ïa ki dkhot ka JAC kiba la kynnoh bunsien ïa arngut ki briew kum ki “Gang” khlem da ai kano-kano ka sakhi kaba khlain.
La kynnoh ruh ba ki dkhot ka JAC kila pynithuh khlem da dei ïa u Pynhunlang Kharbuli kum u Personal Security Officer (PSO) jong u MLA, ka jingkam ba ka nongujor kala kyntait jur.
Haba ñiew ïa kane ka jingkynnoh kum ka jingkynthoh kaba pynjahburom ïa ka ïing ka sem jong ka bad ïa ka kur Kharbuli, kala kyntu ïa ki pulit ba kin tohkit ïa kane ka kam bad ban leh eiei katkum ki kyndon aiñ pyrshah ïa ki briew kiba donkti.
