Shillong, Naiwieng 13
Ka Dorbar Shnong Urkaliar ka pynpaw ka jingsngew -khia sngewdiaw halor ba ki don ki runar ba jrong kti ban pynjot bad khet ïa ki ‘wire’ jong ka kor CCTV bad ki briew kiba sdang ban mushlia ïa ki jingthoh ba la shna pynitynnad hapoh ka Shnong.
U Bah Samborlang Diengdoh u la ïathuh ba ka Dorbar Shnong ka la ïoh haduh 5 tylli ki kor CCTV na ka jingïarap ka Sorkar ha u snem ba la dep, hynrei kaba sngewsih ka long ba ki la don ki briew kiba dusmon ban jrongkti bad khet ïa ki ‘wire’ jong ka kor CCTV kaba la buh jingeh ïa ki nongïalam shnong ban peit ïa ki jingjia ha surok bad ba ha ki shnong ki thaw.
U la ong ba ka jingai ka Sorkar ban buh ïa ki kor CCTV hapoh ka shnong ka ïarap ban pynsuk shibun ïa ki nongkitkam shnong ban peit bad ban tip haba don kino-kino ki jingjia ha ka thaiñ kaba la ai jingshngaiñ katto katne por ïa ki nongleit nongwan khamtam ki briew kiba ïaid kjat ha surok bad ha ki lynti shnong.
U la pynpaw ba ka jingleh ki riew dusmon ban pynjot bad khet ïa ki ‘wire’ jong ka kor CCTV ka la pynlong biang ïa ki nongkitkam shnong ban kynduh jingeh haba ïadei ban peit ïa ki jingjia ha ki lynti shnong, da kaba kdew ba ka shnong Urkaliar lei ka dei ba ju jia borabor ki jingkulmar bapher-bapher.
Sa shisien u Bah Sambor u la kyrpad ïa ka Sorkar ba kan shimkhia ban pynlong ka jingmaramot ïa kitei ki kor CCTV kiba la shah pynjot, ha kajuh ka por u la kyrpad ruh ban ai shuh-shuh sa 5 tylli ki kor CCTV ba thymmai ban buh ha ki bynta bapher-bapher jong ka shnong bad ban buh ki ‘bulb light’ ban pynshai ïa ka surok khnang ba ki nongleh kam sniew kin ym nud ban pynlong jaka shongkai.
U la ong na ka liang ka shnong na ka por sha ka por ka la ïaleh ban trei bha ban pynwandur ïa ka shnong ka thaw, namar kata u la kyntu ïa ki nongshong shnong ban ai ka jingïatreilang ha kajuh ka por u la maham ïa ki briew kiba pynlong jaka khalai ha ka por miet ha ki lynti ïaid kjat ba kim dei shuh ban bteng nangne shakhmat bad ba ka Dorbar Shnong kan sa shim da ki sienjam ba tyngeh nangne shakhmat.
