Shillong, Naiwieng 13
Ka President ka ri India ka Droupadi Murmu ka la sam ïa ki khusnam Arjuna bad Dronacharya sha ki nongïalehkai bad ki Coach, kynthup ïa u Tejaswin Shankar, Vidit Gujrathi, bad ka Lalremsiami, ha Rashtrapati Bhavan.
Ki bun snem jong ka jingtrei shitom, ka jinglen lade bad ki jingjop ha ka kam ïalehkai ki la paw shynna katba ki nongïalehkai bad ki Coach ki la ïohpdiang ïa ki khusnam Arjuna bad Dronacharya na ka President Droupadi Murmu ha Rashtrapati Bhavan ha New Delhi ha ka Sngi Thohdieng.
Ïa u nongïalehkai ‘decathlon’ u Tejaswin Shankar, u Chess Grandmaster u Vidit Gujrathi bad ka nongïalehkai Hockey ka Lalremsiami, ha kane ka jingrakhe ka la long ka kabu ksiar ban phai dien sha la ka lynti ïaid ha ka kam ïalehkai jong ki katba ki dang buh ïa ka thong sha ki jingjop kiba kham khraw.
U nongsiat suloi ba duna ka bor ïohsngew u Dhanush Srikanth bad u nongsiat suloi ba duna dkhot met u Rudransh Khandelwal ruh ki la don lang hapdeng na kiba ïohpdiang ïa ka khusnam Arjuna, katba ki Coach ka Neha Chavan bad u Chhote Lal Yadav ki la ïohpdiang ïa ka khusnam Dronacharya Award.
U Tejaswin, uba la jop ïa ka takma rupa kaba sah kynmaw ha ka ‘decathlon’ ha ka Asian Games 2023 shuwa ba un wan ba-ar ha ka Asian Championships, u la batai ïa kane ka burom kum u mawmer uba khraw hynrei u la ong ba ka jingangnud jong u ka ïaid shajngai palat ïa ka jingjop kaba tang hapoh ka Ri Asia. “Kane ka dei shisha ka khyllipmat kaba kynsai tam ïa nga ha ka jingim ïalehkai jong nga. Nga la lah ban leh bha ha ki kyrdan Asian bad Commonwealth, hynrei ka sienjam kaba bud ïa nga ka long ban pyrshang ban long u nongjop takma ha ka kyrdan ïakob jong ka pyrthei. Nga kwah ban leit sha ka Olympic Games. Ka jingïaid lynti jong nga lehse ka dang poi tang shiteng lynti ha kane ka khyllipmat. Kane ka dang dei tang ka jingsdang,” u la ong.
