Shillong, Naiwieng 13
U nongïalehkai ba mih bujli, u Tremiki Lamurong, u la thep ïa ka kol jop ha ka minit ba 84 ban pynjop ïa ka Shillong Lajong FC da 2-1 pyrshah ïa ka Sreenidi Deccan FC ha ka jingïalehkai ba shongshit jong ka Indian Football League 2026-27 ha SSA Stadium mynta ka janmiet sngi Thohdieng.
Kane ka jingjop ka la pynkiew shipor ïa ka Lajong sha khlieh duh jong ka miej ïakhun da 7 poiñ na ki lai tylli ki jingïalehkai, katba ka Sreenidi ka sah ha ka kyrdan ba saw da 4 poiñ.
Ka Lajong ka la bat bha ïa ka bol naduh kaba sdang, bad ka la pynkhih ïa u nongap kol ka Sreenidi, u Kamaljit Singh, lyngba ka kol u Everbrightson Mylliempdah ha ka minit ba 10. Ha kawei pat ka liang, ka Sreenidi ka la jan ïoh kol haba ka bol ba la shut da u David Castañeda ka la dei ha baroh ar tylli ki dieng kol hadien ba la pynkynriah da u nongap kol ka Lajong, u Ranit Sarkar, uba la hap mih noh na madan namar ka jingmynsaw ha ka kylla step bad la wan bujli da u Siwel Rymbai.
Hadien ba ym shym la don ba ïoh kol ha ka kylla step, ki trai ïing (Lajong) ki la plie ïa ka jingïohthep kol ha ka minit ba 51. ‘U Player of the Match’, u Joedson dos Santos, u la ïoh pdiang ïa ka bol ba la pashat da u Ephraim Lalremtluanga bad u la thep da ka kjat kadiang ban tam ïa u Kamaljit.
Ka Sreenidi ka la jubab da kaba pynmih lai ngut ki nongïalehkai bujli hadien ka minit ba 65, bad kane ka la seisoh ha ka minit ba 72 haba u nongïalehkai ba mih bujli, u Nicolas Morinigo, u la ryngkang halor u Joedson ban pyndei da ka khlieh ïa ka bol ba la wan na kamon na u Jagdeep Singh ban thep bad pynïaryngkat ïa ki kol.
Ka Sreenidi ka la pynsep-ei ïa ka kabu ksiar ban tam sha khmat hynñiew minit hadien kata, haba u Adriano Castanheira u la shut palat sha jrong na khmat kol. Ka Lajong ka la lah ban thep kol sa shisien ha ka minit ba 84 lyngba u Lamurong.
U Kenstar Kharshong u la ïada bha na laiñ kol ban khanglad ïa ka jingpyrshang pynïaryngkat kol jong u Castañeda ha ki minit ba khatduh, bad pynskhem ïa ki lai poiñ na ka bynta ka Lajong shwa ka jingïalehkai jong ki sha bar pyrshah ïa ka Dempo ha ka 19 tarik u Naiwieng.
