Tura, Naiwieng 13
U Myntri Rangbah ka jylla u Conrad K. Sangma hynne ka sngi Thohdieng u la pynbna ba ka sorkar kan sa pynbiang ïa ka ïingskul bathymmai bad kawei ka madan ïalehkai (stadium) na ka bynta ka shnong Bhaitbari, katba u dang plie paidbah ïa ka lympung ïalehkai phutbol P.A. Sangma Memorial Football Tournament kaba ar ha ka madan B.M. Model School.
Haba plie ïa kane ka lympung ha West Garo Hills, u Sangma u la ong ba ïa kane ka rai yn sa shim hadien ba la ïakren bad ki ophisar sorkar bad ki nongmihkhmat, katkum ki kyndon ba la buh.
U la ïaroh ïa ki paidbah ka Rajabala kiba la pynlong ïa kane ka lympung da kaba synniang pisa lang kum ka shnong ka thaw, da kaba kdew ba ki nongshong shnong ki la ïa noh synñiang lang haduh T. 20 lak.
“Ïa kane ym shym la pynlong tang da uwei u briew, ka sorkar, lane da kano kano ka seng marwei. Hynrei ki paidbah ki la ïatreilang. Kane ka dei ka nuksa kaba bha shisha,” u la ong.
U Conrad u la ai khublei ïa u Myntri barim u Abdus Saleh uba la shim ïa kane ka sienjam bad u la pynpaw ruh ïa ka jingsngewnguh ïa ka ïing ka sem jong u na ka bynta ka jingburom ïa u (L) Purno Agitok Sangma.
U la kynmaw biang ba u P.A. Sangma u la pynlong ïa ka jingïalang ïalap elekshon kaba nyngkong jong u ha u snem 1977 ha kane kajuh ka madan, kaba dei ka jingshisha ba la ïathuh ha u da u Saleh.
U la ban jur ruh halor ka jingieit phutbol kaba khraw ha katei ka thaiñ, da kaba ong ba u Saleh u la ïathuh ha u ba ka tnum jong katei ka skul ka la jot ym dei na ka daw ka suiñbneng, hynrei ka dei na ka daw ba ki nongpeitkai ki kiew halor jong ka ban peit ïa ki jingïalehkai.
U Myntri Rangbah u la ong ba ka sorkar ka dang shna tam ïa ki 50 tylli ki madan phlang artificial turfs ha kylleng ka Meghalaya bad ïa ka madan ïalehkai phutbol kaba heh tam ha Shillong kaba lah ban ngiam haduh 40,000 ngut ki nongpeitkai.
Haba khot ïa u Saleh kum u kñi jong u, u Conrad u la ong ba ha ka riti ka dustur jong ki Garo, ka jingpan jong u kñi ka dei kaba donkam ban burom bad pyndep mar-mar.
U la pynkynmaw biang ïa ka jingkut jingmut jong u ban wanrah ïa ka roi ka par kaba mar ryngkat ha baroh kawei ka jylla bad u la kyntu ïa ki paidbah ba kin ai ïa ki jingai jingmut lyngba ka CM Connect helpline 1971, uba u la ong ba la peitngor da ki ophisar bad da u hi shimet.
