Shillong, Naiwieng 13
Ka Voice of the People Party (VPP) lyngba u Bah Ardent Miller Basaiawmoit, President u la ong ba lada ka Sorkar ka dang kuman ïa ka jingdawa ka JAC ban pyndam noh ïa ka projek Ropeway ha u Lum Shyllong kan poi ka por ba kum ki nongïalam ka VPP, kin hap ban mih ban ai ka jingkyrshan.
Ïa kane u Bah Ardent u la pynpaw hadien ba ka jingïakhih ka JAC ha motdur u Kiang Nangbah ka dangïai bteng haduh mynta, wat lada ki la leit ban tur shaduh Secretariat ruh.
Haba kren lyngba ka kyrwoh ba la phah, u Bah Ardent u la ong “Hato ngin shu sngap bad peit kai ïa ka jingkuman bad jingleh ka Sorkar halor ka jingdawa ka JAC”.
“Ka party kam lah ban shu peit kai ïa ka jingleh ka Sorkar bad ngim lah ban shu ieh ïa kane ka kam tang ha ki longkmie. Kumta lada dei ïa ka VPP ban mih ruh kan sa mih, namar ba ka Sorkar ka la shu ïuhroit bad pyntieng ïa ki nongïakhih,” la ong u Bah Ardent.
U la ong ba ha kata ka por, lada ki mih kim dei ban kynnoh ba ki nongïalam ka VPP ki shim kabu ne ki leh politik halor kane ka kam.
U la ong ba katei ka khlaw ba thmu shna Ropeway, kadei ka khlaw ba bsa ïa ki tyllong um kiba bun khamtam ha Nongbah Shillong baroh kawei.
“Kine ki nongmihkhmat paidbah kiba long tang ki nongshakri paidbah, ki la leh ïa kane ka kam kumba kadei ka nongkynti jong ki, bad ruh kumba ki lah ban rai hi ïa kano-kano ka kam, khlem ka jingmynjur ki paidbah,” la bynrap u Bah Ardent.
