Shillong, Naiwieng 13
Ka Meghalaya College Teachers’ Association ka la kynnoh ba ka Sorkar Jylla ka pyrshang ban thoh biang ïa ka jingshisha kaba la dep pynbeit da ka ïingbishar (High Court) kaba la pynkhreh ïa ka Draft Pension Scheme 2023.
Ha ka kyrwoh ba ka MCTA ka la jubab ïa ka jingpyntip jong ka tnad pule puthi ha ka 12 tarik u Naiwieng, kaba la ai jingmut ba katei ka Draft Pension Scheme 2023 ka dei tang ka jingtyrwa ba la ai da ki nonghikai bad ba kam dei ka skhim ba la pynkhreh da ka Jylla.
Ka MCTA kaba dei ka nongmudui ha ka WP (C) No. 281 jong u snem 2017, ka la ong ba ka jingthoh ba la buh da ka Sorkar ka rem haba la tynjuh pyrshah ïa ka rai na ka ïingbishar ba ha khlieh duh jong ka Jylla Meghalaya ha ka 10 tarik u Naiwieng 2026.
Ka MCTA ka la kdew ba ka Paragraph 2 jong ka jingbishar ka kdew shai ba la dep ban thaw ïa ka Trust bad la pynkhreh ïa ka Draft Scheme da ka Jylla bad la aiti sha ki nongmudui na ka bynta ka jubab bad jingai jingmut jong ki.
Ka Jylla ka dei kaba nyngkong ban aiti hakhmat ka High Court ha ka 22 tarik u Lber 2023 ba kan pynkhreh ïa ka skhim kaba lah ban pdiang da ki nonghikai. Katkum ka jingthaw ïa ka Trust, u nongïasaid aiñ u la aiti thikna ïa ka Draft Rules jong ka Sorkar Jylla sha ka MCTA ha ka jingbishar ka 6 tarik u Nailur 2023, na ka bynta ka jubab bad ki jingai jingmut jong ka. Dei hadien kata ka jingïamir jingmut ba la bthah da ka ïingbishar, ha ka 5 tarik u Risaw, 2023, ba ka MCTA ka la pynphai biang ïa ki jingai jingmut jong ka halor ka jingthmu jong ka Jylla sha ka Sorkar.
Ka kam, kam shym la kut tang hangta, ha ka 15 tarik u Nohprah 2025, la ong ba ki nongshah mudui ha ka Jylla ki dei ban pyntip katkum ka aiñ ïa ka Penshon, ha kaba ka ïingbishar ka la kdew ba kano-kano ka jingpynkylla kan long kum ka jinglehsniew ïa ki dkhot jong ka seng ki nongmudui bad kumjuh ïa baroh ki nongtrei jong ka kiba don hok ban ïoh ïa ki jingmyntoi jong ka skhim bad ban bthah ïa ka Jylla ban pynbeit pura bad ban pynbna noh ïa ka.
Ka MCTA ka la ong ba ka jingpyrshang jong ka Sorkar ban shna thymmai ïa ka Draft kum ka jingtyrwa jong ka hi ka leh klet ïa kane ka histori ba lah buh ha ka ïingbishar. “Ka jingthoh biang ïa ki jingshisha ba la dep buh jingthoh ha ki jingbishar kan ym lah ban pynbeit ïa ki jingeh ba dei hok jong ki nonghikai katkum ka Provident Fund Act 1969, ym lah ban pynkylla marwei khlem ka jingïamir jingmut ba shisha bad ki nongshim bynta” la ong ka MCTA.
Haba pynpaw biang ïa ka jingïatylli kaba pura bad ka Khasi Jaiñtia Deficit School Teacher’s Association bad baroh ki nongtrei Deficit ha kylleng ka Jylla, ka MCTA ka la kyntu ïa ka Sorkar ban pdiang ïa la ki jong ki rai bad jingpyrshang ha kaba ïadei bad ka 2023 Draft Scheme bad khamtam eh ban burom ïa ki hukum ba lah bthah da ka ïingbishar.
