Shillong, Naiwieng 13
U Symbud Myntri Rangbah ka Jylla u Bah Prestone Tynsong uba khmih ruh ïa ka tnad PWD (Roads) u la pyntip ba ka Sorkar Jylla ka la mang T.45 klur na ka bynta ban shna pynbha bad maramot ïa ki thliew ki syar jong ki surok ha nongbah Shillong shwa ban pdiang ïa ka lympung National Games 2027.
U Bah Prestone u la ong ba ïa ka work order kaba shongdor T.45 klur la dep ban pyllait na ka bynta ban shna pynbha ïa ki surok ha nongbah Shillong kiba hap hapoh ka Central Division.
“Ïa ka work order ba T.45 klur la dep ban pyllait na ka bynta ban shna pynbha bad tap rong biang ïa ki surok ha nongbah Shillong, kiba hap hapoh ka Central Division,” ong u Bah Prestone.
U la ong ruh ba u la dep ban bthah ïa ka Bypass Division ba kan pynkhreh ïa ka ‘estimate’ na ka bynta ki kam maramot, kynthup ha ka surok National Highway.
“Nga la dep ban bthah ïa ka Bypass Division ba ka ruh kan pynkhreh lypa, kynthup ïa ka National Highway, ha kino-kino ki bynta ba don ki thliew ne kiba donkam ban siang rong biang, ki hap ban phah noh ïa ka ‘estimate’,” u la ong.
U Bah Prestone u la ong ba ka Sorkar ka kwah ban pynthikna ba ka jingpynïasoh ïa ki surok ha nongbah Shillong bad ha ki jaka ba marjan bad ka nongbah ki dei ban long kiba la pynkhreh bha shwa ka National Games.
