Ban khang lad ïa jingsniew dei ban ïatrei lang baroh. Kawei na ki lad ka long ka mynsiem kitkhia jong ki kmie ki kpa ïa la ka ïing ka sem, ka jingai por jong ki kylluid ïa la ki khun ki kti ban sngewthuh ïa ki jingeh ba ki ïa kynduh ban ïa kit ïa bah lang ban ïasyllok ïaphylliew jingmut lang ban pyni buit ban ïa pyni bor lang.
Sa kawei pat ka lad ka long ba ki nongsynshar kumba dei ka bynta jong ki ban thaw ki lad ki lynti ban plie ki kam ki jam ia kiba khlem kam. Nalor ki kmie ki kpa, ki shnong ki thaw ki dei ban don ïa ki kynhun shakri mon sngewbha ban ïa syllok ïa ki ïing ki sem kiba don jingeh, ban ïarap ïa ki ha ka khia ka shon. Dei tang ka jingïateilang da baroh ki bor ba ngin khanglad ïa ka jingsniew.
Tang ka synshar khadar kam biang, tang ka niam kam biang tang ka kynhun trei mon sngewbha kam biang, tang ka bor shnong bor thaw kam biang, tang ka ïing ka sem kam biang. Hynrei da kaba ïatrei lang baroh yn ioh ban teh lakam ïa ka jingsniew kata lada lait nawei yn set nawei bad kumta ter ter.
Kaba kongsan ïa kine baroh dei ka jingkut jingmut ha la marwei marwei ban isih ïa ka jingsniew bad ieit ia ka kam babha. Ngim dei ban ai lad ba ka pisa kan bat lakam ïa ka longbriew manbriew ne ba kan synshar ïa ka jingmut jingpyrkhat jong ngi. Ngin trei shitom na ka bynta ka burom bad ka nam. Ban khanglad ïa ka jingsniew ka long ban ïa treilang da baroh ki paidbah hapoh ka ri.
C. B. Iawphniaw
