New Delhi, Naiwieng:
Ka Iran ha kane ka kynti, la ong ba ka la byrngem ïa ki arngut ki ophisar jong ka tnat shipai duriaw ka America, kiba ka la shah pharep don kti ha ka jingthombor ïa kawei ka skul ha Minab, kaba la shim ïa ka jingim jong 168 ngut ki khynnah, da kaba ong ba ki dang trei shitom ruh ban ioh ïa ki. Ka tnat Embassy jong ka Iran ha South Africa ka la pynpaw ïa kane ka jingkren ha ka social media platform X, katba ka dang ïasam biang ïa ka jingthoh jong ka kaba la 8 bnai shaphang ki arngut ki heh jong ka US kiba ka la batai kum ki “nongleh kam sniew”.
“Ngin sa lap ïa phi”, la ong ka embassy ha ka jingthoh kaba saw kyntien ha ka ktien phareng katba ka dang shim ïa ka jingthoh kaba kham rim. Ka la pynithuh ïa kitei ki ophisar kum u Commander Leigh R Tate, uba dei u ophisar ba la aiti ha ka USS Spruance bad u Lieutenant Commander Jeffrey E York, uba shakri kum u executive ophisar jong katei ka liengsuin.
“Kynmaw ïa kine ki arngut ki nongleh kam sniew. U Leigh R Tate, u nongialam shipai, bad u Jeffrey E York, u executive officer jong ka USS Spruance, kiba la hukum ban siat lai sien ïa ki namding Tomahawk, kiba la pyniap ïa 168 ngut ki khynnah kiba lui lui ha kawei ka skul ha Minab,” la thoh ha ka post ba 29th u Lber.
“Hato kim don khun la ki jong ki jong ki khun?” ka la bynrap katba ka kynnoh paidbah ïa ki arngut halor ka jingpyniap ïa ki khynnah.
Katei ka jingbyrngem, ka la mih shisngi, hadien ba U President jong ka US, U Donald Trump, ula maham ïa ka Tehran, ba kan nym thombor ïa ki heh ophisar jong ka America. U Trump, ha ka jingïakren dang shen, u la maham ïa ka Iran ba “kin ym don slem than, shuh” lada don kino kino ki heh sorkar jong ka US kiba shah pynïap.
Ha ka jingsdang jong ka thma jong ka US bad ka Israel pyrshah ïa ka Iran ha u bnai February, ym duna ïa ka uwei u namding jong ka US u la siat ïa ka skul Shajareh Tayyebeh ha Minab ha kaba la pyniap ïa 156 ngut ki briew, ba kynthup ïa 123 ngut ki khynnah.
Kane ka jingbyrngem kaba khadduh ka long ruh hadien ka jingpynkynriah noh ïa u Treasury Secretary jong ka US, u Scott Bessent, na ka jaka sah jongu ha ka thaiñ Washington sha ka ktem shipai, hadien ka jingbyrngem pynïap kaba ïai bteng, kaba la ïathuh ba ka don jingïadei bad ka Tehran.
