Dhaka, Naiwieng:
Ki nongkyrshan jong ka seng Awami League jong ka Myntri Rangbahduh ka Bangladesh ba la shah weng shuki ki la pynlong ïa ki jingïakhih ba shyrkhei ha ka shnong trai jong ka ha Gopalganj ha ka Sngi U Blei, ha kaba ki la thombor ïa ki kali bad ki jaka buh pulit hapdeng ka jingjur ka jingïakynad ha ka saiñ hima sima halor ka jingthmu jongka ban wanphai biang sha ka ri ha u bnai Nohprah.
Da ki spah ngut ki nongïakhih ki la mih sha ki surok ban ialum lang, da kaba rah ïa ki jingthang bad ki la thang ruh ïa kawei ka kali kit tiar jong ki pulit bad pynjulor ïa kawei ka jaka sah jong ki pulit, la iathuh ki heh bad ki lad pathai khubor.
Kitei ki jingiakhih, ki wan mih hapdeng ka jingiakynad kaba dang iai bteng, halor ka jingthmu ban wanphai jong ka Hasina, na India, ha kaba ka la sah naduh ba ka la phet krad na Bangladesh ha u Nailar 2024, hadien ba ka jingiakhih, kaba la ialam da ki samla pule, ka la pynkhyllem ïa ka sorkar jongka.
Lah ban kdew hangne ba ka Hasina ka la shah rai pynrem khlem pep ha ka ïingbishar International Crimes Tribunal jong ka Bangladesh ha u Naiwieng 2025 halor ki kam runar pyrshah ïa ka longbriew manbriew halor ka jingpynshitom beiñ ka sorkar jongkam ïa ki paidbah nongïakhih. Hynrei la ong ba katei ka nongialam barim ka ri Bangladesh ka la kyntait ïa ka jingshah kynnoh bad ka jingbishar.
Ka Hasina, kaba 79 snem ka rta, ka la pynbna bunsien naduh u Naitung, ba ka thmu ban wanphai biang sha Bangladesh ha u bnai Nohprah bad ban mad ïa ki kyndon ain, wat hapdeng ka jingpynshitom iap pyrshah ïa ka.
Ka sorkar Bangladesh ka la pan ïa ka ban pynphai noh ïa ka na India lyngba ka jingiateh ba arliang mamla. Ka la kyntait ruh ïa ka jingkyrpad jong kawei ka tnat aiñ kaba don ha London na ka bynta ka Hasina ban ïoh ïa ka passport ban pynsuk ïa ka jingwanphai jong ka.
U myntri ka tnat ain u Md Asaduzzaman u la ong ha kane ka Sngi Saitjaiñ ba ka Bangladesh ka la pyndep ïa ka kam ain ban pynthikna ïa ka jingwanphai biang jong ka Hasina bad ba ka rai mynta ka shong ha ka India.
Ka India ka la kam ba ka la pdiang ïa ki jingkyrpad jong ka Bangladesh ban pynphai biang noh ïa ka Hasina sha la ri hynrei kam shym la pynbna satia ïa ka rai bad ïa ki jingtip ba pura halor ka jingwanphai jong ka Hasina sha katei ka ri.
Ha kajuh ka por, ki nongïakhih ha ka Sngi U Blei, ki la pynpra noh ïa u mawkyrteng, uba la tei kum ka jingkynmaw ïa ka jingshah weng noh jong ka sorkar jong ka Hasina, ha ka 5tarik u Nailar, 2024, bad ki la pynpra ïa ki jingker jong ki pulit ban rung sha ki katto katne ki surok ha ka sor Gopalganj. Bun ki kynthei kiba ïakhih ruh ki la ïashim bynta ha ki jingïakhih.
Ia kane ka jinglong jingman ha Gopalganj la iakren ha ka jingialang jong ka kynhun myntri ba la pyniaid da u Myntri Rangbahduh ka ri u Tarique Rahman ha ka Sngi U Blei. U myntri rangbah u la iakynduh ruh ïa ki nongialam ba rangbah jong ka party ha Parliament, ong ka khubor Prothom Alo.
Da kaba kdew na ki nongïalam ka BNP kiba tip bha ïa katei ka jingïalang, ka kot khubor ka la ong ba u Rahman u la kyrpad ïa ki nongïakhih jong ka seng ban “ïalehkai” ha madan.
U heh sorkar u la ong ba ki bor synshar kin buddien ïa ka jinglong jingman bad kin pynjur da ka jingpynjari ïa ki bor jong ka aiñ ban tehlakam ïa kino- kino ki jngjia kiba ktah ïa ka shongsuk- shongsaiñ hapoh ka ri.
