Shillong, Naiwieng 16
Ka Khasi Jaiñtia Christian Leaders Forum (KJCLF) ka la ong ba ïa ka jingïakajia kaba jur bha halor ka Shillong Ropeway Project, ym dei ban pynbeit da ka jingïakynad, hynrei da ka jingkhmih ba laitluid da ki riewshemphang, kiba la mynjur lang da baroh arliang mamla.
Ka KJCLF ka la pynpaw ka jingsngewkhia shibun ïa ka jingkynthoh bad jingpyrshah jong ki paidbah halor ka Projek Ropeway, khamtam eh ïa kito kiba shah ktah beit beit kiba don marjan jong kane ka projek, kaba don ha ka thaiñ Riat Laban jong u Lum Shyllong.
Ha ka kyrwoh ba la phah da u Secretary kata u Rev. Edwin H Kharkongor u la ong ba ka Forum ka kyrshan ïa ki longkmie kiba mihkhmat ha ka liang pyrshah halor ka jingïoh um lyngba u Lum Shyllong.
“Ki nongïalam Khristan ki la ithuh ïa ka jingkitkhlieh ba la shim da ki kynthei bad ki longkmie kiba la pynpaw ïa ka jingsngewkhia jong ki, na ka bynta ka jingpynneh pynsah bad ka jingpynbiang ïa ka um ha ka Nongbah bad ki jaka ba marjan jong ka Shillong, mynta bad ha ki por ban wan ruh,” la ong ka kyrwoh.
“Ka Forum ka la kdew ba ki kynthei ki ju don hakhmat eh ban pynpaw bad pyrta halor ki mat kiba ktah ïa ka hok ba kongsan eh jong ka jingim briew bad ki jaka shong jaka sah,” la bynrap ka kyrwoh.
Ka Forum ka la pdiang ruh ïa ka jingthmu ka Sorkar da kaba kdew “Ka jingkwah ka Sorkar kaba mynta ka long ban wanrah ïa ka roi ka par bad ka jingpynmih khajna ba kham heh sha ka Sorkar lyngba kane ka projek Ropeway, kaba khmih lynti bad thrang ba ka Sorkar kan long kajuh ka kyrdan bad kiwei pat ki Jylla”.
Hynrei ka la maham ba ka roi ka par kam lah ban long kaba jop khlem ka jingpdiang ki paidbah.
“Khnang ba ka roi ka par kan long kaba jop, ka Sorkar ka dei ban shimkhia ïa ka jingpdiang ki nongshong shnong jong ka hi, kiba ka jingïatreilang jong ki ka long kaba kongsan bha ha ka synshar paidbah bad na ka bynta jong ki, ki thmu na ka bynta ka projek pynroi,” la ong ka Forum.
Namarkata, ka la kyrpad ban pynkylla biang.
“Ka KJCLF namarkata ka la kyrpad ïa baroh ar tylli ki kynhun, ka liang pyrshah bad ka liang synshar, ban bishar bniah bad ban pynbeit thymmai ha ka rukom kaba ïadei, ïajan bad kaba pynhun,” ka la ong.
“Watla katta ka Forum kam pat lah ban ïakren ïa ki jingbha bad jingsniew jong kane ka jingtyrwa, ka tyrwa ba dei ban jied ïa kawei pat ka kynhun kaba kynthup ïa ki riewshemphang kiba hapdeng bad kaba la mynjur da baroh arliang mamla, ban pule bniah ïa baroh haba ïadei bad kane ka projek, da kaba shim ïa ki jingmut ba la pynpaw da baroh arliang mamla,” la ong ka kyrwoh.
