Amlarem, Naiwieng 17
U Triostar Kassar ula ïoh ban khyrwit da ka hat-trick na ka bynta ban pynlong ïa ka Hynriam SC ban pynjem khnap ïa ka Ladjaplem haduh shiteng dorjon (6-0 kol) ha ka lympung ïalehkai Third Division Football League.
Ha kane ka lympung ïalehkai ba la pynlong da Amlarem Sub-Divisional Sports Association ha ka sngi Ba-ar ha Mini Stadium Ladjaplem kaba ha Amlarem, u Triostar u la khur ïa katei ka hat-trick hadien ba u la ïoh ban thep saw kol ha ka minit kaba 4, 16, 20 & 52. Ïa ki ar kol kiba sah la thep da u Lesterket Kassar (13) bad u Wannam Kassar (50).
Ha ka jingïalehkai kaba bud, hapdeng ka Langshiang Amsyrwai bad BC Padu Shnongpdeng ka la kut ha ka jingïakhaid hadien ba kim shym la lah ban thep kol haduh kaba kut ka jingïalehkai.
Katba ka Thaw U Sdiah United ka la pynliem noh ïa ka Mawlong SSC da 1-0 kol bad ïa kane la thep da u Kamhah Nyalang ha ka minit kaba 35.
Ha kawei pat ka jingïalehkai hapdeng ka Amlarem SC bad YC Pdengkarong ki la ïakhaid mar 2-2 kol na ka bynta ban ïasam mar shi kol.
Ha kane ka jingïakhun ka Amlarem ka la ïoh ban thep kol nyngkong lyngba u Bisen Suting ha ka minit kaba 14 bad u Hoping Langshiang (82). Katba na ka liang ka YC Pdengkarong ka la pynphai kylla lyngba u Special Nongrum (38) bad u Batskhem Pohshna (46).
