Shillong, Naiwieng 17
Ka kynhun ki nongsiat khnam ka jylla Meghalaya kam shym la lah ban khur wat tang kawei ka takma ha ka NTPC National Archery Champion-ships 2026, kaba la poi sha kaba kut ha ka sngi Ba-ar ha madan Parade ha Umsawli, New Shillong.
Kumba ka paw ka Jylla ka la sei haduh 24 ngut ki nongïalehkai ban shim bynta ha ka jingïakop siat jong ka Indian Round, Recurve bad Compound, hynrei ha baroh lai tylli ki kyrdan ïakop kim shym la lah ban ïatynjuh bor bad kiwei pat ki nongsiat khnam kiba la wan na kylleng ki jylla jong ka ri India.
Ha ka jingshisha kane ka lympung ïakop kaba la pynlong da ka Archery Association of Meghalaya hapoh ka jingkhmih da ka Archery Association of India bad la kyrshan lang da ka tnat ialehkai ka Sorkar Jylla, ka dei kum ka jingsdang hashwa ba ka Meghalaya kan pynlong ïa ka 39th National Games, kaba la thmu ban long ha u Lber jong u snem ban wan.
Kumba ka long mynta ka Jylla ka dangsah sa tang saw bnai ban pynlong ïa katei ka lympung kaba heh duh jong ka ri, hynrei ki kynhun ïalehkai ki donkam ban trei shitom nangne shakhmat khnang ba kin long kiba la khreh na ka bynta katei ka lympung.
Ïa ka nam lahduh ha katei ka lympung la rah da ka Punjab kaba khur 5 tylli ki takma ksiar, katba ka Maharashtra ka la wan ba-ar da kaba khur 4 tylli ki takma ksiar bad ka Delhi ka la wan balai hadien ba ka la khur 4 tylli ki takma ksiar.
Ha ka Recurve, ka Maharashtra ka la jop lai tylli na san tylli ki nam lahduh, da kaba khur ïa ka takma ksiar ha ka Mixed Team pyrshah ïa ka Railways bad baroh ar tylli ki takma ksiar, pyrshah ïa ka Haryana ha ka final jong ki kynthei bad ïa ka Services ha ka liang ki shynrang.
Ka Jharkhand ka la jop ïa ka nam lahduh ha ka women’s individual pyrshah ïa ka Maharashtra, katba ka Delhi ka la khur ïa ka takma ksiar ha ka liang ki shynrang pyrshah ïa ka Services. Ha ka Compound, ka Punjab ka la jop ïa baroh ar tylli ki nam lahduh jong ki kynhun, ha kaba ka la pynliem ïa ka Uttar Pradesh ha ka phainal jong ki kynthei bad ïa ka Madhya Pradesh ha ka final jong ki shynrang.
Ka Delhi ka la khur takma ksiar ha ka mixed team pyrshah ïa ka Uttar Pradesh bad ha ka liang ki shynrang ka la jop ïa ka All India Police Sports Control Board (AIPSCB), katba ka Telangana ka la khur ïa ka takma ksiar jong ki kynthei pyrshah ïa ka Tamil Nadu.
Ha ka Indian Round, ka Rajasthan ka la rah ïa ka nam lahduh jong ka Mixed Team bad ki shynrang, ha kaba ka la pynliem ïa ka Uttar Pradesh bad ka Manipur. Ka Uttar Pradesh ka la ïoh khur ïa ka takma ksiar jong ka kynhun kynthei pyrshah ïa ka AIPSCB bad ïa ka nam lahduh jong ki kynthei pyrshah ïa ka Punjab, katba ka Punjab ka la khur ïa ka takma ksiar jong ki shynrang pyrshah ïa ka Uttar Pradesh.
Ïa ki khusnam la sam da u Myntri Rangbah ka Jylla u Conrad K. Sangma kum u kongsan ha ryngkat u Myntri ka tnad ïalehkai Bah Wailadmiki Shylla kum u symbud kongsan, ha ryngkat u Director ka tnat ïalehkai Bah Alertson Nongbri, ha ryngkat ki dkhot ka AAM bad ki nongïalam ka Meghalaya State Olympic Association bad kiwei.
