Ka thong kaba hakhmat eh ka long ban sdang noh ïa ki lympung ïalehkai: Dr. Mawsor

Nongstoiñ, Naiwieng 17 Ka Nongstoiñ District Sports Association (NDSA) ka la ïoh ïa ki nongkitkam kiba thymmai hadien ba kane ka synjuk kam shym la lah ban pyntyllun ïa ki lympung ïalehkai phutbol. Kane ka...

Nongstoiñ, Naiwieng 17

Ka Nongstoiñ District Sports Association (NDSA) ka la ïoh ïa ki nongkitkam kiba thymmai hadien ba kane ka synjuk kam shym la lah ban pyntyllun ïa ki lympung ïalehkai phutbol.

Kane ka jingioh ka NDSA ïa ki nongkitkam kiba thymmai ka dei hadien ba la lah ban pynlong ïa ka Annual General Meeting ban jied ïa ki nongkitkam kiba thymmai ïa kaba la pynlong ha ka 16 tarik mynta u bnai, bad lah ban kdew hangne ba kane ka jingïoh jong ka NDSA ïa ki nongkitkam ka dei ruh hadien 12 snem ba la jied ïa ki nongkitkam kata naduh u snem 2013.

Ha kane ka sngi u Dr.L Mawsor u la shah jied kum u President ba thymmai jong ka NDSA , katba u Bah G.J.L Sangriang u la shah jied kum u General Secretary lem bad kiwei kiwei ki nongkitkam .

Haba ïakren bad u nongthoh khubor, u Dr. Mawsor ha kaba nyngkong u ka pynpaw ka jingai khublei ïa baroh ki klob jong ka NDSA kiba la jied ïa u kum u president, bad u la pynpaw ruh ba ha kane ka samoi trei kam kaba thymmai ka ban kut ha u 2029, ka thong kaba hakhmat eh ka long ban sdang noh ïa ki lympung ïalehkai. “Ha u Nohprah mynta u snem yn sdang noh ïa ki lympung ïalehkai khnang ba ki kynhun ki ban khur nam lahduh kin ïoh pat ka lad ban mihkmat sha ka Meghalaya State League”.

Shuh shuh u la ong ruh ba sa kawei pat ka bynta ka dei shaphang ka madan ïalehkai kaba haduh mynta ym pat shym la ïoh ïa ka madan phlang plastik bad kane ka council kaba rim ka la pruid dak ban ïoh ïa ka madan ïalehkai kaba paka bad kyrmen skhem da ka jingïatreilang bad ïarap jong ka Sorkar yn sa lah ban ïoh noh ïa ka madan siang phlang plastik khnang ba yn lah ha ka ban ïalehkai phutbol baroh shi snem.

U Dr. Mawsor u la kyntu ruh ïa baroh ki nongïalam bad ki nongkitkam jong ki klob ba kin sngewbha ban ïa bud ryntih ïa ki kyndon lane ki kyndon aiñ pynïaid phutbol jong ka NDSA bad ka MFA ,namar kawei kaba pynsngewsih ka long ba ki nongïalehkai ki kwah ban ïalehkai najan baroh synjuk mynta, kata ki leit ïalehkai sha Mawshynrut bad ha kajuh ka por ki leit sha Mawkyrwat, nangta ki kwah ban ïalehkai sa ha Nongstoiñ ruh, te kane ka long kum ka jingpynkheiñ ïa ki kyndon riti trei kam jong ka MFA.

“Nga kyntu ba kin shim khia ïa kane bad nga kyrpad ruh ban ailem ka jingïatreilang namar tang ka NDSA khlem ki klob ka shu long lehnohei,” la bynrap u Dr. Mawsor.

Kumba ka paw katei ka synjuk kam shym la lah ban pynlong ïa ki lympung ïalehkai phutbol la ar snem kynthih kata ha snem 2025 bad 2026 naduh ka Super, First, Second bad ka Third Division ha kaba ka la wanrah ka jingduhnong kaba khraw ïa ki nongïalehkai ka thaiñ West Khasi Hills hi baroh kawei.