Shillong, Naiwieng 17
Hadien ka jinglah ban ïoh khur ïa ki nam jop bapher bapher ha ki lympung ïakop pyni dohksah kiba la pynlong ha ka jylla bad ha ka Ri ruh, u Bransley D Nongkynrih na ka Iron House Gym ula lah biang ban wanrah nam bad burom ïa ka jylla bad ïa ka Ri hi baroh kawei hadien ba u la lah biang ban khur ïa ka nam jop ha ka NPC Worldwide Kazakhstan Pro Qualifier 2026 kaba la pynlong ha ka 7 tarik mynta u bnai ha Almaty, Kazakhstan.
Nalor u Bransley, u Wilynder Khonglam ruh u la wan ha ka kyrdan ba saw ha kane ka jingïakop kaba long shisha ka jingsngew-sarong ïa ka Jylla hi baroh kawei.
Hadien ba la wanphai sha ka Jylla, na ka liang kiba haïing hasem ki paralok parajor jong u samla Bransley bad u Wilynder ki la pynkup burom ïa kine ki arngut ki samla ha ka prokram kaba la pynlong ha Hidden Hills Resort kaba don ha Diengïong, New Shillong.
Ha ka prokram kaba la pynïaid da u Gordon J. Thabah la pashat ïa ki kyntien pdiang burom sha ki arngut ki samla ka Jylla bad ruh sha baroh kiba la ïawan sha ka jingïalang pynkup burom.
Haba ai jingkren ha katei ka sngi, u Bransley ula ïathuh ba ka shimpor ïa u haduh kumba arsnem ban pynkhreh ïa ki jingïakop bapher bapher bad ula ïathuh ruh ba ka jingangnud bad jingthrang jong u ka long ban ïoh ïa ka Pro Card ha ka Body Building. U Bransley u pynpaw ruh ïa ka jingkmen namar ki briew kiba kongsan ha ka jingim jong u kiba kynthup naduh ka kurim, ki kmie ki kpa ki hynmen para bad ki paralok parajor baroh ki ai mynsiem bad kyrshan ïa u ha kane ka jingïaid lynti jong u ban ïakhun ha ka lympung kaba don shabar ka ri.
Kumban shu pynkynmaw u Bransley ula khur ïa ka takma ksiar ha ka Classic Physique – A Category. Hashwa jong kane ula jop ruh ha ka kyrdan jong ka Classic Physique and Bodybuil-ding ha ka lympung ïakop jong ka Sheru Classic NPC Regional North India Championship kaba la pynlong ha Chandigarh ha ka 11 tarik u Risaw.
La pynbyrngia ïa ka prokram ha katei ka janmiet lyngba ki jingrwai kiba la rwai da ka samla Sarah Lee bad u samla Shanlang Laloo bad kiwei kiwei. La pynkut ïa ka prokram lyngba ki kyntien ai khublei na ka Dr. Wakaru Shullai.
