Champions Cup: Khur jingjop nyngkong ka Sanmer, pynliem ka Mawpdang ïa ka Nongkrem

Shillong, Naiwieng 17 Ka Sanmer SC ka la wanphai da ka jingjop kaba nyngkong ha ka lympung ïalehkai SSA Champions Cup 2026, hadien ba ka la lah ban pynliem noh ïa ka Sohryngkham SC da...

Shillong, Naiwieng 17

Ka Sanmer SC ka la wanphai da ka jingjop kaba nyngkong ha ka lympung ïalehkai SSA Champions Cup 2026, hadien ba ka la lah ban pynliem noh ïa ka Sohryngkham SC da 5-1 kol ha ka jingiakhun ka Group-B ha ka sngi Ba-ar ha SSA Stadium, Polo.

Ha kane ka jingiakhun, ka Sohryngkham ka la ïoh ban shad kmen nyngkong hadien ba u Winstar Kharpran (20′) u la ïoh ban pynkhih jar nyngkong.

Pynban kane ka jingshad kmen kane ka kynhun kam shim la lah ba kan neh slem, namar ba ka Sanmer SC, ka la ïakhun tyngeh tad haduh ba kan da ïoh ban thep san kol, ha kaba lai tylli na kine ki dei kiba la ïoh ban thep da u Maxcimilando Tariang (28′, 31′, 60’P) bad ïa ki kol kiba sah pat la ïoh ban thep da u Joinborlang Nongspung (40′) bad u Isharwer Mukhim (46′).

Ha ka jingshisha ka stadium ka la sdang ban khih win hadien ba ka Sohryng -kham kaba bat ïa ka kyrdan ba-ar jong ka Second Division, ka la ïoh ba kan pynkhih jar nyngkong, pynban haba wan ban bteng pat ïa ka kylla miet, ka Sohryng -kham kam shim la lah ban ïalehkai bha bad ka la long ka jingplie lad ïa ka Sanmer SC ba kan khur syndon ïa ka jingjop ba nyngkong ha kane ka lympung.

Ha kane ka jingïaid lynti, ka Sanmer ka la nam ïa ka jingshah rem da 1-0 kol ha ka Shillong Lajong FC hadien kane da 2-1 kol ha ka Mawkhar SC, hynrei hynne ka sngi ka la lah pat ba kan kheit ïa u soh ka jingjop ba nyngkong.

Haba phai sh akawei pat ka jingïakhun kaba ar, ki kol ba la thep da u Jonathan Kharbani (22′, 39′) bad Donlad Diengdoh (73′), ki la biang pura ïa ka Mawpdang SC ba kan pynliem noh ïa ka Nongkrem da 3-0 kol.

Da kane ka jingshah rem, kan pynlong artad ïa ka Nongkrem ba kan mad ïa ka nam rem kaba lai sien lynter jong ka ha kane ka lympung bad ka la duh rung sha ka semi-final ha ka Group-A.

Ka Mawpdang kaba dei ruh ka lahduh jong ka Fourth Division mynta ka snem, ka la ïoh ban kan shut haduh 6 tylli ki corner tang ha ka kylla miet, haba ïa nujor pat bad ka Nongkrem, ka kabu ksiar kaba la mih paw ka dei ka jingpyrshang kaba la wan lyngba u Banganson Nongphlang uba la shut jam bha ïa ka bol ïa kaba la lah ban khanglad noh da u rangapkol ka Mawpdang u Embhahlang Khongnoh ha ka minit kaba 88.

Kane kan dei ka jingjop kaba nyngkong ïa ka Mawpdang ha kane ka lympung bad kaba kyntiew joit ïa ka sha ka kyrdan kaba lai hadien ba ka la ïoh ban khur ïa ki 4 poiñ.