Shillong, Naiwieng 17
Ki nonghikai Deficit kiba hap hapoh ka shatri ka Khasi Jaiñtia Deficit School Teachers Asso-ciation (KJDSTA) Jaïaw-Mawkhar Zone, ha ka 17 tarik Naiwieng ki la pynlong ka jingïakhih da kaba ïaid paidbah ha jan lum jingtep Jaïaw ryngkat ka jingpyrta ‘Ngim dei ki kruiñ’, ‘Ngim dei ki sohpyut’, ban pynrem halor ka jingkren u Bah Prestone Tynsong.
Kane ka jingïakhih ki nonghikai, ka dei ruh shibynta ban dawa na ka Sorkar halor ki mat jingdawa kaba ka Sorkar haduh mynta kam shym la pat pynurlong ïa ki mat jingdawa kiba la slem bha.
Haba kren sha ki lad pathai khubor ka Dr. Careen E.G Marbaniang – Zonal Representative ka la ong ba ki sngewsih namar ba ki khynnah ki dang don ha ka exam, hynrei kim banse ban mih shakhmat ban ïakhih namar ka Sorkar ka leh mynthi ïa ki jingdawa jong ki.
Ka la ong ba ki nonghikai kim ju ïoh ïa kaei-kaei da kaba suk, hynrei ki hap shuwa ban ïakhih ban ïoh ïa ka hok jong ki.
“Hooid phi la ïohi ba u Symbud Myntri Rangbah u la khot ïa ki nonghikai ba ki dei ki kruiñ. Bah Prestone kane ka dei ka sur jong nga, ba nga dei ka Kmie, ka nonghikai, kaba bsa ruh ïa ki khun, ka riew kynthei bad nga don ruh ka jingkitkhlieh na bynta ka imlang ka sahlang. Ngi wan ha kane ka jingïakhih ruh namar ba ngi don ka jingsngewkhia na ka bynta ka lawei ka pateng ban wan,” ka la ong.
Ka Kong M. Baidya, Secretary Jaïaw-Mawkhar ka la pynpaw ka jingsngewsih halor ka jingshah khot ki nonghikai ba ki dei ki kruiñ. “Ngim ju da kham pyndonkam ïa kum kine ki ktien ba kan pynmong ïa kiwei hynrei ki Myntri Sorkar pat ki kren kum kine ki ktien, kaba pynmong shisha ïa ki nonghikai.”
Haba ïadei bad ka jingïakhih dawa jong ki na ka Sorkar, ka Kong M. Baidya ka la ong ba ka CPF ba ki kynshew ka poi shano, namar haduh mynta ki shu sah ha ka umdum ba khlem pat pyllait.
