Pynbna u Majhi ban kyntiew ïa ka kam pynroi ha Malkangiri

Bhubaneswar, Naiwieng: U Myntri Rangbah ka jylla Odisha u Mohan Charan Majhi ha ka sngi U Blei u la pynbna ïa ki kam pynroi kiba shongdor T.161 klur tyngka na ka bynta ka Malkangiri distrik...

Bhubaneswar, Naiwieng:

U Myntri Rangbah ka jylla Odisha u Mohan Charan Majhi ha ka sngi U Blei u la pynbna ïa ki kam pynroi kiba shongdor T.161 klur tyngka na ka bynta ka Malkangiri distrik haba pynskhem ba ka jingpynkupbor ïa ki jaitbynriew riewlum ka long kaba donkam bha na ka bynta ban tei ïa ka Odisha kaba roi bad ka ri India kaba kiew shaphrang.

Haba ai jingkren ha ka jingrakhe Janjatiya Gaurav Diwas ha ka kyrdan jong ka jylla ha Malkangiri ha ka sngi kha kaba 151 jong u nongïaleh laitluid riewlum u Birsa Munda, u Majhi u la ong ba u dei u dak babha tam jong ka mynsiem laitluid jong ki jaitbynriew riewlum bad u nongmihkhmat ha ka jingïakhun pyrshah ïa ka jingbymhok bad jingshah lehbeiñ.

U Myntri Rangbah u la plie ïa ki 28 tylli ki hostel kiba dang shna thymmai kiba la shna ha ka jinglut kaba T.55 klur ban pynsuk ïa ka jingpule hapdeng ki samla pule riewlum. U la buh ruh ïa ki maw nongrim na ka bynta 35 tylli ki projek kiba kynthup ïa ka jingbei tyngka kaba T.106 klur na ka bynta ban pynbha ïa ki jingtei bad ka roi ka par baroh kawei jong ka distrik. U Myntri Rangbah u la ong ba ka sorkar jylla ka la sdang ïa ka Mukhyamantri Janjati Jeevika Mission 2.0 ban pynlong kumba 8 lak tylli ki longiing Scheduled Tribe bad Particularly Vulnerable Tribal Groups (PVTG) kiba lah ban shaniah ha ka ïoh ka kot ha ki 5 snem ban wan.

Da kaba 58 percent na ki nongshong shnong jong ka Malkangiri ki dei ki riewlum, u Majhi u la ong ba la buh hakhmat eh ïa ka distrik ha ki kam imlang sahlang, ka ïoh ka kot bad ka synshar khadar. Ar tylli ki projek karkhana kiba kynthup ïa ka jingbei tyngka kaba T.4,200 klur ruh la khmih lynti ba kin sa mih shen ha ka distrik.

U la khot ban thaw ïa ka ‘Team Malkangiri’ ban ïatreilang bad ka ‘Team Odisha’ sha ka roi ka par jong ka jylla. U Myntri Rangbah u la ong ba ka sorkar jong u ka buh hakhmat eh ban pynbiang ïa ki ïing pucca sha baroh ki longïing kiba sahkut ha ka rukom kaba la pyndap. U la ïathuh ba ka sorkar pdeng ka la mang saw lak tylli ki ïing hapoh ka Pradhan Mantri Awas Yojana-Gramin hynrei hadien ka jingkyrpad shimet jong u, la pynkiew ïa ka jingmang pisa sha ka san lak tylli.

“Nga la pan na u Myntri ka tnad pynroi nongkyndong jong ka sorkar pdeng u Shivraj Singh Chouhan na ka bynta sa shi lak tylli ki ïing bad nga ngeit skhem ba ka jingdawa jong ngi kan urlong”, la ong u Majhi.

U Myntri Rangbah u la kdew ruh ïa ka jingpyntreikam ïa ka Reservation ha ki jaka pule kiba kham shalor, kynthup ïa ki jingpule Engineering bad Medical, na ka bynta kiwei pat ki klas kiba dang sahdien, bad u la ong ba 24 tylli ki Eklavya Model Residential School kiba thymmai ki la sdang ban treikam ha Odisha, kaba pynlong ïa ka jingdon jong ki baroh sha ka 71 tylli, kaba bun tam ha ka ri.

Haba shim ïa ka jingkynthoh saiñ hima sima ïa ki sorkar ba la dep, u Majhi u la ong ba ki riew pawkhmat jong ka ri kum u Birsa Munda, u Netaji Subhas Chandra Bose bad u Sardar Vallabhbhai Patel kim shym la ïoh ïa ka jingithuh kaba biang shwa u snem 2014 namar ba ki khana pateng ki dang sah ha kawei ka longïing. U la ai khublei ïa u Myntri Rangbahduh ka ri u Narendra Modi uba la wanrah ïa ka jingithuh kaba kham khraw ïa kine ki riewshlur ki bym pat pawnam bad seng ïa ka Janjatiya Gaurav Diwas ha u snem 2021.

Ha kane ka sngi la ïashim bynta da u Myntri ka School and Mass Education bad ST & SC Development u Nityananda Gond, Nabarangpur MP Balabhadra Majhi, Malkangiri MLA Narasingha Madkami bad Chitrakonda MLA Mangu Khilla.