Ïasoi MoU ka Sorkar Jylla ban aiti ïa ka Baljek Airport sha ka AAI

Shillong, Naiwieng 19 Ka Sorkar Jylla bad ka Airports Authority of India ha ka sngi Palei ki la ïasoi ïa ka soskular lane Memorandum of Understanding (MoU) ban aiti bad shimti noh ïa ka kad...

Shillong, Naiwieng 19

Ka Sorkar Jylla bad ka Airports Authority of India ha ka sngi Palei ki la ïasoi ïa ka soskular lane Memorandum of Understanding (MoU) ban aiti bad shimti noh ïa ka kad liengsuiñ Baljek, Tura, kane ka long ka sienjam ba kongsan haba ïadei ban pynïaid ïa ka rukom treikam ka kad liengsuiñ bad ban pynbha ïa ka jingpynïasoh liengsuiñ ha Rilum Garo.

Ïa kane ka soskular la ïasoi ha ka jingïadonlang u Myntri Rangbah ka Jylla, u Conrad K. Sangma, u Symbud Myntri Rangbah ka Jylla u Bah Sniawbhalang Dhar bad ka dkhot jong ka Airports Authority of India (HR) ka Nivedita Dubey.

“La ïasoi ïa ka MoU hapdeng ka Sorkar Meghalaya bad ka Airports Authority of India (AAI) na ka bynta ban aiti bad shimti ïa ka Kad Liengsuiñ Baljek, Tura. Kane ka dei ka sienjam ba kongsan ban pynsuk ïa ka rukom treikam jong ka Kad Liengsuiñ na ka bynta ki jingpynïaid Liengsuiñ ha ka thaiñ bad ban kyntiew kyrdan sha ki Liengsuiñ ba khamheh kiba hap hapoh ka Scheme RCS-UDAN 6.0” ong u Conrad ha ka jingthoh jong u ha rynsan X.

“Kane ka jingpyrshang ban pynbeit pynbha ïa ka jingïadei ha ki thaiñ bad ban plie ki lad ki lynti kiba khamheh na ka bynta ka kam jngohkai pyrthei, ka khaïi pateng bad ka jingroi ha ka ïoh ka kot jong ka Rilum Garo” u la bynrap.

Hapoh kane ka jingïateh, ka Airports Authority of India, kan shim ïa ka jingkitkhlieh ha ka ban pynïaid, ban maramot bad ka pynbha ïa ka Kad Liengsuiñ Baljek hadien habud.

Ha ka Phase-I, ka bor pynïaid liengsuiñ kan pynheh lane kyntiew ïa ki kad liengsuiñ kiba yn lah ban shong haduh 19 ngut kaba hap hapoh ka jingpynïaid ka Modified RCS-UDAN Scheme. Ïa ka jinglut jingsep yn kyrshan hapoh katei ka skhim ka ban siew ïa ka bai lutksan, khlem kano-kano ka jingktah ha ka liang ka pisa tyngka ka Sorkar Jylla sha ki kam pynroi ïa ka Kad Liengsuiñ hapoh ka Phase-I. La khmih lynti ba ka Sorkar India kan ai kumba T.100 klur na ka bynta ban pynroi ïa katei ka Kad Liengsuiñ hapoh katei ka skhim.

Tang mar sien pyndep ïa ki kam pynheh bad ka jingtreikam kan sdang, ka Kad Liengsuiñ Baljek kan sa lah ban shah kynthup hapoh ka RCS-UDAN. Kane kan plie lad ïa ka jingïasoh lyngba ki lynti suiñ hapdeng ka Tura bad ki jaka ba kongsan kum ka Shillong, Guwahati, Kolkata bad kiwei-kiwei ki nongbah jong ka thaiñ Shatei Lam-Mihngi.

Ha kajuh ka por, ka Airports Authority of India kan pynkhreh ïa ka jingthmu ba kongsan jong ka na ka bynta ban pynroi shuh-shuh ïa kane ka Kad Liengsuiñ khnang ban pynsuk ïa ki Liengsuiñ kiba hap hapoh ka thup ATR-72 bad A-320.

Hadien ba la dep ïa ki kam pynroi, ka bor ba dei peit kan shim ïa ka jingkitkhlieh ba pura na ka bynta ki jingpyntreikam ïa ka Kad Liengsuiñ, ba kynthup naduh kaba pynïaid ha ka leit ka wan jong ki Liengsuiñ, ka jingpynïadei, ka jingpeitngor bad ka jingshakri ban pynïaid ïa ka jingleit jingwan jong ki liengsuiñ bad ki jingtreikam jong ka Kad Liengsuiñ, katba kan kit ruh ïa baroh ki jinglut jingsep kiba ïadei bad ka Kad Liengsuiñ ba hadien habud.

Ka Sorkar Meghalaya kan ai ïa baroh ki jingkyrshan ba donkam, kynthup ïa ka jingdon jong ka jaka, ki jingtei, ki jingpynbna katkum ka aiñ bad ki jingpynbeit ïa ka jingpahara, ban pynsuk ïa ka jingpyntreikam ha ka por kaba biang bad ban pynheh ïa ka Kad Liengsuiñ ha ki por ban wan.

La khmih lynti ba ka jingpyntreikam ïa ka Kad Liengsuiñ kan ïarap ban pynsuk haba ïadei ka jingpynïasoh ïa ki Kad Liengsuiñ ha ka thaiñ bad kan kyntiew ruh ïa ka kam jngohkai pyrthei, ka khaïi pateng bad kan kyntiew ruh ïa ka ïoh ka kot jong ki nongshong shnong ka Rilum Garo bad ka Jylla hi baroh kawei.